सम्मानजनक मन्त्रालय पाए चित्रबहादुर केसी मन्त्री बन्ने

१ कात्तिक, काठमाडौ । अहिलेसम्म सरकारमा सहभागी नहुने नीति लिँदै आएको राष्ट्रिय जनमोर्चाले सम्मानजनक जिम्मेवारी पाएको अवस्थामा अध्यक्ष चित्रबहादुर केसीलाई नै सरकारमा पठाउन सकिने निर्णय गरेको छ ।

तर, सम्मानजनक मन्त्रालय नपाएको अवस्थामा अध्यक्ष केसीको साटो उपाध्यक्ष दूर्गा पौडेल मन्त्री बन्ने मोर्चाको आन्तरिक निर्णय छ ।
राष्ट्रिय जनमोर्चाको मातृ पार्टी नेकपा मसालको शनिबार बसेको बैठकले सरकारमा जान सकिने निर्णय गरेको हो ।

तर, प्रधानमन्त्री केपी ओलीसँग छलफल गरेपछि मात्रै केसी वा पौडेलमध्ये कसलाई मन्त्री बनाउने भन्ने जनमोर्चाले टुंगो लगाउने भएको छ । यसबारे मोर्चाले प्रधानमन्त्री केपी ओलीसँग छलफल गर्ने निर्णय गरेको एक नेताले अनलाइनखबरसँग बताए ।

तर, केसीले माग्न लागेको राम्रो मन्त्रालय भन्नाले कुन हो भन्ने चाँहि मोर्चाले गोप्य राखेको छ । राजनीतिक बरिष्ठताका हिसाबले झलनाथ खनालका समेत राजनीतिक गुरु मानिने केसीले उपप्रधानमन्त्री सहितको मन्त्रालय माग्न सक्ने स्रोतले बतायो ।

यसैवीच झापा आन्दोलनमा केपी ओलीसँगै काम गरेका नेकपा मालेका महासचिव सीपी मैनालीले उपप्रधानमन्त्रीसहितको मन्त्रालय माग गरेका छन् ।

विगतमा भने नेकपा मालेले सम्हालेका मन्त्रालयहरुमा राम्रो भूमिका देखिएको छैन । मालेका नेताहरु कमिसनमा लिप्त हुने गरेको आरोप लाग्दै आएको छ ।

अघिल्लो सरकारमा नेकपा मालेका तर्फबाट सीपी मैनालीकी पत्नी निलम केसीले वालवालिका तथा समाजकल्याण मन्त्रालय सम्हालेकी थिइन् ।

नेकपा मालेमा मैनाली दम्पतीबाहेक सांसद अइन्द्रसुन्दर नेम्वाङ पनि मन्त्रालय हाँक्न सक्ने सक्षम युवा नेता मानिन्छन् ।