पोखरामा यसरी गरियो नयाँ वर्षको स्वागत (फोटो फिचरसहित)

१ वैशाख, पोखरा । पर्यटकीय शहर पोखरामा बिभिन्न कार्यक्रमसहित नयाँ वर्षको स्वागत गरिएको छ । नयाँ वर्षको स्वागतका लागि लेकसाइडमा ठूलो भीड लागेको थियो । गएको वर्षभरी भूकम्प र नाकाबन्दीले उकुसमुकुस भएका नेपालीले सुखद भविश्यको कामनासहित नयाँ वर्षको स्वागत गरे ।

नयाँ वर्षको स्वागतका लागि पोखरामा मेला लागेको थियो । त्यसो त हरेक बर्ष यस्तै हुने गर्नछ । नयाँबर्षको पूर्वसन्ध्यामा आन्तरिक तथा बाहृय पर्यटकको व्यापक चहलपहल देखिएको थियो । नयाँ वर्षको अवसर पारेर पश्चिमाञ्चल होटल संघ पोखराले फेवा महोत्सव गरिरहेको छ । महोत्सवको सांगितिक कार्यक्रममा राती १ बजेसम्म सर्वसाधरणको भीड थियो ।

राती १२ बजे बसुन्धरा पार्कमा भिलिमिली आतिसवाजी गर्दै नयाँ वर्षको स्वागत गरियो । होटल, रेष्टुरेन्ट, डान्स तथा दोहोरी साँझ नयाँ वर्षको स्वागत गर्नेहरुले भरिएका थिए । कतिपय होटलहरुले सांगीतिक कार्यक्रम समेत आयोजना गरेका थिए ।

पोखराको बसुन्धरा पार्कदेखि हलनचोकसम्मको करिव एक किलोमिटर सडकमा नयाँ वर्ष मनाउनेको बाक्लो भिड थियो । बसुन्धरा पार्कमा सांगितिक कार्यक्रम आयोजना गरिएको थियो ।

नयाँ वर्षकै कारण वर्षभरी सुनसान बनेको पोखरामा चहलपहल बढेको छ । नयाँ वर्षको विहान यहाँका प्रमुख गन्तव्यहरु भरिभराउ देखिएका छन् । खासगरी फेवाताल किनारमा बढी भीडभाड देखिएको छ ।

तस्वीर : उमेश पुन/अनलाइनखबर