आजबाट छायांकन सुरु गरिएको चलचित्र ‘पर्व’को एक आइटम गीतमा मोडल माला लिम्बुले निर्देशक निश्चल बस्नेतसँग कम्मर मर्काएकी छिन् । ‘काले काले’ बोलको गीतमा माला र निश्चलको आइटम नृत्य समावेश छ । माला चलचित्रको मुख्य भूमिकामा छिन् भने निश्चललाई दर्शकले यहि आइटम गीतमा मात्र देख्न सक्नेछन् ।
सुवास गिरी र निकिता पौडेलको लगानीमा आजबाट छायांकन सुरु भएको यो चलचित्रलाई ३५ दिन लगाएर खिचिनेछ । ‘काले काले’ बोलको यो गीतमा निश्चल बस्नेत र मिना निरौलाको स्वर, दिनेश राउतको शब्द, कोशिश क्षेत्रीको संगीत छ ।
ललितपुर च्यासल खेल मैदानको पछाडि सेट लगाएर यो गीतको छायांकन भैरहेको छ । कविराज गहतराजको कोरियोग्राफी रहेको गीतलाई राजेश श्रेष्ठले खिचिरहेका छन् ।
राजु पेन्टरले यो भव्य सेट तयार पारेका हुन् । आइतबारसम्म यो गीतको छायांकन हुनेछ । चलचित्रलाई दिनेश राउतले निर्देशन गर्नेछन् । चैत्र २५ गते यो चलचित्र रिलिज हुनेछ । चलचित्रको यो गीतलाई चाडै नै दर्शकमाझ सार्वजनिक गरिनेछ ।
तस्बिरः विनोद पोख्रेल
