२९ असोज, काठमाडौं । अन्तर्राष्ट्रिय क्रिकेट परिषद (आईसीसी) ले श्रीलंका क्रिकेटका पूर्व कप्तान सनथ जयसुर्यामाथि भ्रष्टाचारविरुद्धको नियम तोडेको आरोप लगाएको छ ।
४९ वर्षका पूर्व अलराउण्डर जयसुर्याले आईसीसीले गरेको अनुसन्धानमा सहयोग नगरेको बताइएको छ । असहयोग गर्नुका साथै जयसुर्यामाथि अनुसन्धानमा बाधा पुर्याएको आरोप पनि लागेको छ ।
जयसुर्याले श्रीलंकन छनोट टिमको प्रमुख भएर पनि काम गरेका थिए । उनीमाथि लागेको आरोपबारे प्रष्टीकरण दिन १४ दिनको समय दिइएको छ ।
श्रीलंकाले १९९६ मा विश्वकप जित्दा जयसुर्या प्लेयर अफ दि टुर्नामेन्ट भएका थिए । श्रीलंकाका लागि उनले ४४५ एकदिवसीयमा २१ शतक हानेका छन् भने ३ सय २३ विकेट पनि लिएका छन् ।
११० टेस्ट क्रिकेटमा उनले ४०.०७ को एभरेजमा ६ हजार ९ सय ७३ रन बनाएका थिए । अन्तर्राष्ट्रिय क्रिकेटबाट २०११ मा सन्यास लिएका जयसुर्याले २०१२ सम्म टी-२० भने खेलेका थिए ।
यो महिनाको सुरुमा आईसीसी एन्टी करपसन युनिटका जनरल म्यानेजर एलेक्स मार्सलले श्रीलंकन क्रिकेटमा भएको भ्रष्टाचारका बारे गम्भीर अनुसन्धान आवश्यक रहेको बताएका थिए ।
