कुवेतसँग नेपाल १-० ले पराजित

३ मंसिर, काठमाडौं । विश्वकप र एसियन कप छनौट अन्तर्गत कुवेतसँगको दोस्रो खेलमा नेपालले हारका बाबजुद सुधारिएको प्रदर्शन गरेको छ । भुटानको थिम्पुमा मंगलबार नेपाल १-० गोल अन्तरले पराजित भएको हो ।

कुवेतको घरेलु मैदानमा भने यही टीमसँग नेपाल ७-० गोलको विशाल अन्तरले पराजित भएको थियो । रंगशाला तयार नभएपछि नेपालमा हुनुपर्ने खेल भुटानमा भएको हो ।

बदर अल मतवाले २८ औं मिनेटमा कुवेतका लागि निर्णायक गोल गरे । खेलको चालिसौं मिनेटमा रोहित चन्दको प्रहारलाई कुवेतका गोलकिपरले उत्कृष्ट बचाउ गरेका थिए ।

पहिलो हाफको तुलनामा दोस्रो हाफमा नेपालको प्रदर्शनमा सुधार आएको थियो ।

समूह ‘बी’ को चौथो स्थानमा रहेको नेपालको पाँच खेलबाट जम्मा तीन अंक छ । त्यति नै खेल खेलेको कुवेत १० अंकसहित अंक तालिकाको दोस्रो स्थानमा छ ।