३१ जेठ, काठमाडौं । कोरोना भाइरस (कोभिड-१९) विरुद्धको लडाइँमा सरकार असफल भएको भन्दै युवाहरूले शनिबार माइतीघरमा प्रदर्शन गरेका छन् ।
सामाजिक सञ्जालमा आबद्ध युवाहरूको अगुवाईमा सरकारविरुद्ध प्रदर्शन हुँदै आएको थियो । तर शनिबार माइतीघरमा प्रदर्शन गर्ने कार्यक्रम राखेका थिए ।
तर लिम्पियाधुरा, कालापानी र लिपुलेक क्षेत्रलाई समेटिएको नयाँ नक्साअनुसार निशान छाप परिर्वतन गर्न सरकारले ल्याएको संविधान संशोधन विधेयक पनि संसदबाट पास गर्ने तयारी भएसँगै प्रदर्शनकारी अलमलमा परे ।
केहीले प्रदर्शन रोक्नुपर्ने मत राखे भने केहीले पूर्व निर्धारित प्रदर्शनलाई जारी राख्नुपर्ने बताए । उनीहरूले माइतीतर मण्डलामा प्रदर्शन पनि गरेका छन् ।
प्रदर्शनमा सहभागीहरूले कोरोनासँग जोडिएका विषयमा सरकारलाई प्रश्न गरेका छन् भने नयाँ नक्साका लागि सरकारलाई धन्यवाद समेत दिएका छन् ।
त्यसका लागि उनीहरूले ‘लिम्पियाधुरा, कालापानी र लिपुलेक समेटिएको नेपालको नयाँ नक्साका लागि धन्यवाद नेपाल सरकार । तर १० अर्बको हिसाब खोइ ? लेखिएको ठूलो ब्यानरका साथै ‘नक्साका लागि धन्यवाद, नो आरडीटी १०० प्रतिशत पीसीआर’ लेखिएको प्ले कार्ड पनि बोकेका थिए ।
