वैज्ञानिक वन व्यवस्थापन कार्यविधि खारेजीको निर्णय फिर्ता लिन माग

फाइल तस्वीर

२२ माघ, काठमाडौं । नेपाल वातावरण पत्रकार समूह (नेफेज) ले २०७१ देखि लागू वैज्ञानिक वन व्यवस्थापन कार्यविधि खारेज गर्ने सरकारको निर्णयको विरोध गरेको छ ।

नेफेजले एक प्रेस विज्ञप्ति जारी गदै सो निर्णय तत्काल फिर्ता लिन पनि आग्रह गरेको छ ।

विज्ञप्तिमा भनिएको छ , ‘नेफेजले यो निर्णयअघि नै कार्यविधि वा पद्धति आफैंमा खराब हुँदैन, कार्यान्वयनमा केही जटिलता हुन सक्छन् र छन्, र तीनको समाधान त्यहीँबाट निकाल्नुपर्छ तर खारेज गर्नु हुँदैन भनेर आफ्नो धारणा सार्वजनिक गरेको थियो ।’

सरकारले वातावरण संरक्षण र दीगो विकासका क्षेत्रमा पटकपटक दोहोरो चरित्र प्रर्दशन गर्दै आएको पनि नेफेजले जनाएको छ ।

वायु प्रदूषण नियन्त्रणका लागि विद्यूतीय सवारी साधन प्रवर्द्धन गर्ने नीति र योजना बनाएर राजनीतिक प्रतिवद्धता जनाउने तर यस्ता साधनमा लाग्ने भन्सार र अन्तःशुल्क बढाउने, वनजन्य उद्योग प्रर्वद्धन गरेर रोजगार सिर्जना गर्ने नीति लिने तर वनको वैज्ञानिक व्यवस्थापनविरुद्धको निर्णय गर्ने जस्ता सरकारी निर्णयले वातावरण र प्राकृतिक सम्पदा संरक्षण तथा दीगो उपयोगमा सरकार अनुदार भइरहेको पुष्टि हुने नेफेजको धारणा छ ।