११ जेठ, काठमाडौं । भारतको नयाँ दिल्लीस्थित नजफगढमा एक एयर एम्बुलेन्स दुर्घटनामा परेको छ । बिमानमा प्राविधिक खरावी आएपछि चालकले बिमानलाई खेतमा आकस्मिक अवतरण गराएका थिए ।
समाचारहरुका अनुसार बिमानलाई नजफगढको केकैर गाउँको खेतमा क्र्यास ल्याण्डिङ गराइएको थियो । बिमान पटनाबाट दिल्ली जाँदै थियो ।
बिमानमा सात जना सवार थिए । जसमध्ये दुई जना घाइते भएका छन् भने अन्यको अवस्था सामान्य रहेको उद्धारमा संग्लग्न अधिकारीहरुले जनाएका छन् । खेतमा फोर्स ल्याण्डिङ गराउने क्रममा बिमान दुर्घटनाग्रस्त भएको थियो । दुई घाइतेलाई स्थानीय अस्पतालमा भर्ना गरिएको छ ।
चालकले चलाखीपूर्वक बिमानलाई खेतमा अवतरण गराएका थिए । यद्यपी खेतमा धसिएको बिमानको तल्लो भाग क्षतिग्रस्त बनेको छ ।