९ साउन, काठमाडौं । भूकम्प प्रभावित जिल्लामा खटिएका इन्जिनियर कामविहीन भएका छन् । समयमै अनुदान रकम नपाएर भूकम्पपीडितले घर निर्माण सुरु नगरेकाले इन्जिनियरहरू कामविहीन भएका हुन् ।
भूकम्प प्रभावित ११ जिल्लाका दुई लाख ४४ हजार ६ सय २४ पीडित परिवारसँग राष्ट्रिय पुनर्निर्माण प्राधिकरणले अनुदान सम्झौता गरेको छ । तीमध्ये ३४ हजार नौ सय ४८ पीडित परिवारको खातामा मात्रै पहिलो किस्ताको ५० हजार रुपैयाँ जम्मा भएको छ । बर्खा लागेपछि रकम पाएकाले भूकम्पपीडित कसैले पनि घर निर्माण गर्न सकेका छैनन् ।
प्राधिकरणले भूकम्पपीडितका घर निर्माणमा सघाउने भन्दै भूकम्प प्रभावित ११ जिल्लामा एक महिनाअघि दुई हजार ६ सय इन्जिनियर परिचालन गरेको छ । आफ्नो काम नभएपछि उनीहरू गाविस कार्यालयको सहायकका रूपमा छन् ।
खातामा रकम पुगेका भूकम्पपीडितले निर्माण नथालेकाले इन्जिनियरहरूले काम गर्न नपाएको सिन्धुपाल्चोकका सहायक प्रमुख जिल्ला अधिकारी (सिडिओ) अनन्तबहादुर सिलवालले जानकारी दिएको अाजको नयाँ पत्रिका दैनिकमा समाचार छ । ।
‘अनुदान सम्झौता भएर केही पीडितको खातामा रकम पनि आयो । तर, घर बनाउन थालिएको छैन,’ सिलवालले भने, ‘केन्द्रबाट इन्जिनियर आएका छन् । उनीहरू गाउँमा पुगेका पनि छन् । तर, काम गर्न पाएका छैनन् । घर बनाउने काम नै सुरु भएको छैन । यस्तो अवस्थामा उनीहरूले के काम गर्ने ?’
गोरखाका सहायक सिडिओ नेत्रबहादुर शर्माले घर बनाउन खटिएका इन्जिनियर अनुदान सम्झौतामा गाविससचिवलाई सघाएर बसेको बताए ।
उनले भने, ‘इन्जिनियरहरूले अहिले गाविससचिवसँग बसेर अनुदान सम्झौता गर्न सघाउने काममा खटिएको सुनिएको छ । निर्माण सुरु नभएकाले विज्ञताअनुसारको काम गर्न पाएका छैनन् ।’ काभ्रेका सिडिओ बालकृष्ण पन्थीका अनुसार भूकम्पपीडितले घर बनाउन थालेपछि इन्जिनियर पनि काममा लाग्ने बताए । ‘अहिले गाविससचिवलाई सघाइरहेका छन् । निर्माणका काम सुरु भएपछि उहाँहरूको खास काम पनि सुरु होला ।’
