नेपालमा लगानीको सुरुवात भएको छ-प्रधानमन्त्री कोइराला

५ असोज, अवुधावी, (युएई) । प्रधानमन्त्री सुशील कोइरालाले जल विकाससम्बन्धी पछिल्लो निर्णयसँगै नेपालमा लगानीको नयाँ अध्याय सुरु भएको बताएका छन् ।

संयुक्त राष्ट्रसङ्घको ६९औँ महासभामा भाग लिन न्युयोर्क जाने क्रममा प्रधानमन्त्रीले बाटोमा पर्ने मुलुक संयुक्त अरब इमिरेट्समा भेला भएका मध्यपूर्वी एसिया, पश्चिम एसिया र उत्तरी अपि|mकी मुलुकमा कार्यरत राजदूत तथा कार्यवाहक राजदूतहरुलाई शनिबार राति निर्देशन दिँदै नेपालमा लगानी भित्रयाउन नेपाली नियोगमा खटिने कर्मचारीको ठूलो योगदान रहने बताए ।

कोइरालाले राष्ट्रिय हित नै सबैभन्दा ठूलो स्वार्थ हो भन्दै नेपालको राष्ट्रिय अखण्डता र सार्वभौमिकताभन्दा बाहिर गएर कसैसँग पनि सम्झौता हुन नसक्ने बताए । उनले भने-‘सबैभन्दा ठूलो कुरा राष्ट्रिय सार्वभौमिकता हो, यसलाई बलियो तुल्याउन नेपाल र नेपालीको हितमा काम गरेर देखाउन आवश्यक छ ।’

परराष्ट्रमन्त्री महेन्द्रबहादुर पाण्डेले नियोगमा खटिएर जाने पदाधिकारीले मित्रराष्ट्रसँग दौत्य सम्बन्ध विकास गर्ने, मुलुकको विकास निर्माणमा सहयोग प्राप्त गर्ने तथा अन्य आवश्यक साधनस्रोत जुटाउने विषयलाई प्राथमिकतामा राखेर काम गर्न निर्देशन दिए ।

मन्त्री पाण्डेले भने-‘नियोगले नेपाली नागरिकका आइपर्ने समस्या समाधान गर्नुका साथै सिर्जनशील भई अन्य दुई पक्षीय तथा बहुपक्षीय हितका विषयमा समेत आफ्ना सुझावसहितका कार्यक्रमहरु प्रस्तुत गर्न सक्नुपर्छ ।’

यसैबीच, खाडी क्षेत्रमा बसोबास गर्ने गैरआवासीय नेपाली सङ्घका पदाधिकारीसँग कुराकानी गर्दै प्रधानमन्त्रीले अब नेपालको भविष्य उज्ज्वल भएको बताए ।
उनले भने-‘विकासको प्रक्रिया अगाडि बढयो, छिट्टै संविधान जारी हुन्छ, म धेरै आशावादी छु, अब खराब स्थितिको सामना गर्नुपर्ने छैन ।’