२ कार्तिक, काठमाडौं । मुलुकको प्रमुख प्रशासनिक निकाय सिंहदरबारदेखि जिल्ला तहसम्मका अधिकांश कर्मचारी कार्यालयमा कम बस्ने गरेका छन् । कर्मचारीलाई कार्यालयको कामप्रति बढी जिम्मेवार बनाउन सरकारले निजामति सेवा ऐन संशोधन तयारी गरेको छ ।
सामान्य प्रशासन मन्त्रालयका अनुसार कार्यालयमा बिहान हाजिर गरेर निजी काममा निस्कने प्रवृत्ति कर्मचारीमा बढी छ । यो रोग केन्द्रदेखि जिल्लासम्म रहेको मन्त्रालयले जनाएको छ ।
मन्त्रालयका अनुसार सहरी क्षेत्रमा रहेको धेरैजसो कर्मचारी कार्यालय समयमा पढाउन जाने, कन्सल्ट्यान्सी गर्ने तथा कार्यालय समयमा गोष्ठी तथा सेमिनारमा जाने गर्छन् ।  उनीहरुले दिउँसो आफ्नो काम गरेपछि अपराह्न साढे चारदेखि पाँच बजेभित्र कार्यालय फर्केर हाजिर गर्ने गरेको अध्ययनमा पाइएको नयाँ पत्रिकामा खबर छ ।
व्यवस्थापिका संसदमा पुगेको निजामती सेवा ऐन चौथो संशोधन विधेयकमा कर्मचारीलाई अन्य काम गर्न प्रतिबन्ध लगाउने उल्लेख छ । सामान्य प्रशासनमन्त्री लालबाबु पण्डितले अधिकांश कर्मचारी कामचोर पाइएकाले कर्मचारीलाई बाहिरी काम गर्न निषेध गर्नेगरी कानुन बनाउन लागेको बताए । ‘कतिपय कर्मचारीले त आफ्नो पदीय जिम्मेवारी पनि बिर्सने गरेका छन्,’ मन्त्री पण्डितले भने, ‘जनतालाई सेवा दिनेभन्दा व्यक्तिगत काममा लिप्न हुने गरेको पाइएकाले प्रतिबन्ध लगाउन लागिएको हो ।’