नायिका सुष्मा कार्कीले आउँछु भनेर नआएपछि निर्देशक राजु गिरी शनिबार १२ बजेसम्म पनि तनावमा थिए । सुष्मालाई हट अवतारमा प्रस्तुत गर्दै उनले चलचित्र ‘टाइगर द रियल हिरो’ नामक चलचित्रको ‘मापसेले मार्यो’ बोलको गीत छायांकन गर्ने तयारी गरेका थिए । तर, सुष्मा कार्कीले मोबाइल अफ गरिदिएपछि निर्देशक अप्ठ्यारोमा परेका हुन् ।
शुभेच्छा थापा, अशोक फुयाँल लगायतका कलाकारलाई नचाएपनि राजु सुष्माको ठाउँमा नृत्य गर्ने यूवती नपाएर तनावमा देखिए । तर, मोडल सगुन शाही १२ बजे खबर गर्दा पनि नृत्य गर्न तयार भइन् ।
माघ १६ गतेबाट प्रदर्शनमा आउन लागेको यो चलचित्रलाई राजु आफैले निर्माण गरेका हुन् । उनले यो गीतमा सगुन र शुभेच्छालाई हट अबतारमा नचाएका छन् । यही गीतका कारण चलचित्र चल्नेमा राजु ढुक्क देखिएका छन् । 
