१२ लाख ग्राहकसँग सीम टीभी पुर्‍याउँदै छौं

सन् २०१५ सम्म सवै केवुल टीभी सेवा प्रदायकहरु डिजिटलमा जानुपर्ने इन्टरनेशनल टेलिकम्युनिकेशन युनियनको निर्णयपछि यतिबेला नेपालमा धमाधम केवुल टीभी डिजिटलमा अपग्रेड हुने प्रकृया सुरु भएको छ । जसका लागि सूचना तथा संचार मन्त्रालयबाट मल्टिपल सर्भिस अपरेटर (एमएसओ) इजाजत लिइ बिभिन्न कम्पनीहरुले काम सुरु गरेका छन् । तिनै एमएसओमध्येको एक हो- सीम टीभी । जसले ग्राहकलाई निःशुल्क सेटअप बक्स वितरण गरी बिद्यमान केवल अपरेटरमार्फत् नै आफ्नो सेवा सुरु गरेको छ । के हो सीम टीभी ? के यसले ग्राहकलाई अतिरिक्त आर्थिक भार थपिदिन्छ ? यसको नालीवेली लिएका छौं कम्पनीका प्रबन्ध निर्देशक एमके पौडेलसँग ।

सिम टिभी भनेको के हो ?

छोटकरीमा भन्नुपर्दा सिम टीभी डिजिटल टेलिभिजन प्याकेजसहितको इन्टरनेटको बण्डल हो । सरकारले २०१५ देखि महानगरपालिका र उपमहानगरपालिकाभित्र टेलिभिजन प्रसारण डिजिटल गर्नुपर्छ भन्ने नीति लिइसकेको छ । त्यही कारण केवलमार्फत् टेलिभिजन हेरिरहेका सवैजसो ग्राहकले अब सेटअप बक्स जोडेर डिजिटल प्रबिधिमा लैजानु अनिवार्य हुन्छ । डिजिटल सेवा संचालन गर्नका लागि नै सिम टिभीले सञ्चार मन्त्रालयसँग मल्टिपल सर्भिस अपरेटर (एमएसओ) इजाजत लिएर सेवा सुरु गरिसकेको छ ।

तपाईहरुको सेवा लिन ग्राहकले कहाँ सम्पर्क गर्नुपर्छ ?

अहिले जुन केवल नेटवर्कबाट सेवा लिइरहनुभएको छ, उसैसँग सम्पर्क गरेर वा सीधै हाम्रो कार्यालयमा सम्पर्क गरेर सेवा लिन सक्नुहुनेछ । काठमाडाैंभित्र हाम्रो सेवा लिन स्पेसटाइम नेटवर्कसँग सम्पर्क गर्नुपर्ने हुन्छ भने उपत्यका बाहिरका लागि हामीले तोकेका डिलरहरूमा सम्पकर्क गर्नुपर्छ ।

सीम टीभीले कसरी काम गर्छ ?

सिम टिभिको सेवा नेपालका प्रत्येक शहरमा हाल भइरहेका केवल नेटवर्कबाट नै उपभोक्ताले प्राप्त गर्न सक्नेछन । जसकारण कुनै पनि केवल टेलिभिजन सेवा प्रदायक कम्पनी सिम टिभीका प्रतिस्पर्धी होइनन् । उनीहरुको सञ्जाल विस्तार र विकास गर्न आवश्यक पर्ने अप्टिकल फाइबरलगायत हामी निःशुल्क दिन्छौं । किनभने उहाँहरुले २० औं वर्षदेखि लगानी गर्नुभएको छ । र, उहाँहरुसँग आफ्नै ग्राहकहरु पनि छन् ।
सिम टिभीले डिजिटल टेलिभिजनसहित इन्टरनेटको प्याकेज केवल टेलिभिजनको नेटवर्कबाट नै उपभोक्तामाझ पुर्‍याउने हो । ग्राहकले गरेको रिचार्ज कार्डमा हामीले प्रतिशत सेयरिङ गर्छौं । केवल टेलिभिजन सञ्चालकहरुका लागि सिम टिभीसँग जोडिएर अहिलेसम्म गरेको मिहेनतलाई बसीबसी आफ्नो व्यवसायलाई ‘फ्रुटफुल’ बनाउने अवसर हो ।

सिम टिभीको सेवा लिँदा ग्राहकलाई के फाइदा हुन्छ र केवल नेटवर्कलाई के फाइदा हुन्छ ?

ग्राहकले बिना कुनै लगानी डिजिटल क्वालिटीको टीभी हेर्न पाउनुहुन्छ । सरकारले डिजिटलाइज गर्ने भनिसकेको अवस्थामा सर्वसाधारणले सेटअप बक्समा लगानी गर्नुपथ्र्यो । तर, हामी सेटअप बक्स नै निशुल्क उपलब्ध गराउँछौं । एउटा सेटअप बक्सको बजार मूल्य करिव ५ हजार रुपैयाँ पर्छ ।

अर्को कुरा, मासिक साढे २ सय रुपैयाँ तिरेर ग्राहकले हाइ डिफिनेसनको ६० वटाभन्दा बढी च्यानल हेर्न पाउँछन । यो ग्राहकका लागि ठूलो फाइदा हो । अहिले साढे ३ सय रुपैयाँ तिरेर पनि ५०/६० वटा च्यानल नै हेर्ने हो । सेटअप बक्समा भएको हार्डडिस्कमा आफूलाई मन परेको कार्यक्रम रेकर्ड गरेर आफूलाई अनुकुल भएको समयमा ग्राहकले हेर्न सक्नेछन ।

अहिले ग्राकले पाँच वटा च्यानल हेरे पनि र ६० वटा च्यानल हेरे पनि ३ देखि साढे ३ सय रुपैयाँ तिर्नुपर्छ । तर, सिम टिभीको सेवा लिने ग्राकहले जति च्यानल एक्टिभेट गर्छन, त्यसको मात्रै पैसा तिरे पुछ । यदि सेटअप बक्स बिगि्रयो भने हामी निशुल्क अर्को सेटअप बक्स उपलब्ध गराउँछौं । भौतिक क्षति र हराएको खण्डमा भने ग्राहकले किन्नु पर्छ ।

सेटअप बक्स र अप्टिकल फाइबर बिना डिजिटलाईज हुनै सक्दैन । यी दुबै हामीले निःशुल्क दिन्छौं । डिजिटलाइज भनेको सबै च्यानलको क्वालीटी एकै स्तरमा हुने हो । जुन अहिले छैन । सिम टीभीसँग सहकार्य गरेर ग्राहकलाई सेटअप बक्स दिँदा केवल अपरेटरले पनि आफ्नो बजार विस्तार गर्ने अबसर पाउँछन्।

ग्राहकले अर्को कम्पनीको सेवा लिनु पर्‍यो भने सेटअप बक्स फिर्ता गर्नुपर्छ कि पर्दैन ?

पर्छ । ग्राहकले जुन कम्पनीको सेवा लिन्छन, त्यही कम्पनीले सेटअप बक्स उपलब्ध गराइहाल्छ नि ।

एउटा सेटअप बक्सबाट कतिवटा टीभीमा हेर्न सकिन्छ ? संख्या थपिंदा पनि मूल्य थपिने हो कि साढे २ सयमै हेर्न पाइन्छ ?

एउटा सेटअप बक्सबाट एउटा टिभीमात्र हेर्न सकिन्छ, त्यसका लागि ग्राहकले अढाई सय रुपैयाँ तिरेपुग्छ । थप टिभी हेर्नु परेमा बक्स अनुसार थप पैसा लाग्नेछ । एकै घरमा थपिएका सेटअप बक्सको कति चार्ज लिने भन्ने अझै निर्धारण गरिसकेका छैनौ ।

फाइबर र सेटअप बक्स निशुल्क बाँड्दा लगानी पनि ठूलै हुन्छ होला । त्यसमाथि मासिक शुल्क पनि कम गर्ने भन्नुहुन्छ । फाइदाचाहिँ कसरी लिनुहुन्छ ?

ग्राहक संख्या बढेपछि मात्रै हामीले नाफा खोज्छौं । अहिलेको हाम्रो उद्देश्य भनेको ग्राहक संख्या बढाउने नै हो । विश्वको ट्रेन्ड हेर्‍यो भने पनि सेटअप बक्स निःशुल्क नदिइ यस्तो व्यवसाय सञ्चालन भएको छैन । ग्राहकले एक दिनको रिचार्ज कार्ड लिएर एक दिनमात्रै हाम्रो सेवा लिन पनि सक्छन । एक वर्षको रिचार्ज पहिल्यै गर्छु भन्यो भने हामी दुई महिनाको सेवा बोनस दिन्छौं ।

सिम टिभीलाई बजारमा टिक्न कुनै गाह्रो छैन । यो कम्पनी भनेको विदेशी पब्लिक कम्पनीसँगको संयुक्त लगानीमा खोलिएको कम्पनी हो । निजी कम्पनीले जस्तो २/४ वर्षमै नाफा खाजेका छैनौं । १२ वर्षपछि मात्रै हामी नाफा खोज्छौं ।

कुन-कुन केवल अपरेटरसँग सम्पर्क गर्दा सीम टीभीको सेवा लिन सकिन्छ ?

हामीले काठमाण्डौमा स्पेसटाइम नेटवर्कसँग सम्झौता गरेका छौं । यदि ग्राहकले अन्य कुनै कम्पनीको केवल जोड्नु भएको छ भने हाम्रो सेवा लिन सेवा लिइरहेको संस्था परिवर्तन गरेर स्पेसटाइमसँग जोडिनु पर्ने हुन्छ । त्यसैगरी, बागमती, नारायणी, सगरमाथा र जनकपुरका लागि टप टाइम ट्रेडिंग प्रालि, गण्डकी र धाैलागिरीमा बीसी केवुल, सुदुरपश्चिमका लागि ड्रयागन ट्रेडर्स, बीरगञ्जका लागि एस्किना केवल, सगरमाथा अञ्चलका लागि द्राैपती केवल र मेची र कोशीका लागि पाथिभरा डिजिटल नेटवर्कसँग ग्राहकले सम्पर्क गर्न सक्नुहुने छ।

सिम टिभीको प्रतिस्पर्धा कोसँग हो ?

कसैसँग पनि हाम्रो प्रतिस्पर्धा होइन । हामी आफैंसँग प्रतिस्पर्धी बन्ने छौं ।

तपाईहरुको सेवा शहरमा मात्रै हुन्छ कि गाउँमा पनि पुग्छ ?

हामीले सरकारसँग ७५ वटै जिल्लामा सेवा विस्तार गर्ने सम्झौता गरिसकेका छौं । र, कहाँ-कहाँ कसरी अप्टिकल फाइबरको संभाव्यता अध्ययन गरिरहेका छौं । नेपाल टेलिकमसँग मिलेर पनि सर्भे गरिरहेका छौं ।

नेपालमा यो पब्लिक कम्पनीकै रुपमा सञ्चालन हुन्छ कि प्राइभेट ?

हामीले त पहिल्यै पब्लिक कम्पनी हुन चाहेका थियौं । तर, त्यस्तो नीति नभएकाले पाएन । सरकारसँग हामी नेपालमा सेयर जारी गर्न र ८० प्रतिशतसम्म विदेशी लगानी भित्र्याउन मिल्ने प्रावधान मिलाओस भन्ने माग गरिरहेका छौं ।

वाषिर्क कति कारोबार गर्ने लक्ष्य छ ?

अहिले केवल नेटवर्कसँग भएका १२ लाख ग्राहकमाझ हाम्रो सेवा पुर्‍याउने सम्झौता भएको छ । जसकारण आगामी १८ महिनामा प्रतिग्राहक २ सय ५० रुपैयाँका दरले गर्दा मासिक ३० करोडको कारोबार हुन्छ । यसबाट भएको आम्दानीको ८० प्रतिशत च्यानललाई तिर्नुपर्छ । केवल र सिटीभीले ग्राहकले गरेको रिचार्जको रकमको कुनै प्रतिशत बाँड्ने हो ।

कसरी बजार विस्तार गर्दै हुनुहुन्छ ?

केवल अपरेटर साथीहरुसँग सेवा विस्तारको सम्झौता भइरहेको छ । बिहीबार प्रधानमन्त्री शुशील कोइरालाले उदघाटन गरेपश्चात १३ तारिकदेखि सेटअप बक्स जोड्न सुरु गर्छौ । हामीसँग अहिले साढे ३ लाख सेटअप बक्स छन । सेटअप बक्स र फाइबर दुबै विदेशी कम्पनीले नै निःशुल्क दिएको हो ।

इन्टरनेटको सेवाचाहीँ कसरी प्रदान गर्नुहुन्छ ?

हामीले अप्टिकल फाइबरबाट इन्टरनेट सेवा प्रदान गरिरहेका छौं । यो सबैभन्दा भरपर्दो माध्यम पनि हो । टेलिभिजन सेवामा बण्डल गरेको हुनाले बजारमा भएका इन्टरनेट सेवा प्रदायकहरुको भन्दा हामी २५ देखि ३० प्रतिशत कम शुल्कमा इन्टरनेट सेवा उपलब्ध गराउन सक्छौं ।

कम्पनीमा कति लगानी छ ?

हाललाई कम्पनीमा कूल १० करोड रुपैयाँ लगानी छ । जसमा पाँच जना नेपालीको ५१ प्रतिशत नेपालीको र ४९ प्रतिशत विदेशी -बेलायतको) कम्पनी इमिरेटस इन्भेष्ट लिमिटेड कम्पनीको छ ।