४ जेठ, काठमाडौं । भारतमा पेट्रोल र डिजेल महंगिएको छ । पेट्रोल प्रतिलिटर ८३ पैसा र डिजेल १ रुपैयाँ २६ पैसा महंगो भएको हो ।
पेट्रोल र डिजेलको बढेको मूल्य सोमबार मध्यरातदेखि लागू भएको भारतीय सञ्चार माध्यमहरुले जनाएका छन् ।
मूल्य बढेसँगै भारतमा पेट्रोलको नयाँ मूल्य प्रतिलिटर ६३ रुपैयाँ २ पैसा पुगेको छ । यसैगरी डिजेलको नयाँ मूल्य ५१ रुपैयाँ ६७ पैसा पुगेको छ । भारतबाटै पेट्रोल र डिजेल नेपालमा आयात हुने गर्दछ ।
अब नेपालमा के होला ?
भारतमा हुने मूल्यको फेरबदलले नेपालमा पनि प्रभाव पार्दछ । अन्तराष्ट्रिय बजारमा हुने मूल्यको घटबढ अनुसार स्वतः नेपालमा पनि घटबढ हुने गरी स्वचालित मूल्य प्रणाली लागू गरिएको छ ।
तर, भारतीय नाकाबन्दीपछि एकपटक मात्रै मूल्य समायोजन भएको छ । आजै भारतीय आयल कर्पोरेशनले नेपाल आयल निगमलाई नयाँ मूल्यसूची पठाएको छ ।
आयल निगमका प्रवक्ता मुकन्द घिमिरेले तेलको मूल्य समायोजनबारे कुनै निर्णय नभएको जानकारी दिए ।
