४ साउन, भोजपुर। पूर्वी पहाडी जिल्ला भोजपुरको भुल्के गाविस–२ मन्सरामका कृषक बाँदरदेखि हैरान भएका छन् । कृषकले लगाएको मकै बाली बाँदरले बारीमै आएर खाइदिन थालेपछि कृषक हैरान बनेका हुन् ।
यहाँका स्थानीय दिउँसो बाँदर रुँग्न हरेक घरबाट एकजना मकैबारीमै बस्ने गरेका छन् ।
दिउँसो कृषकलाई बाँदरले हैरान बनाएको बेला राति भने दुम्सीले मकै खाइदिने गरेको कृषकको गुनासो छ ।
हरेक वर्ष बाँदरले दुःख दिने गरेको भएपनि कुनै निकायबाट समाधानको पहल नभएको भुल्के–२ का मनशोभा थापाले गुनासो गरे ।
बाँदरले जिल्लाका धेरै गाविसका कृषकलाई हरेक वर्ष दुःख दिने गरेको छ ।
बाँदरले अन्नबाली खाइदिने भएका कारण कतिपय गाउँका बासिन्दा बसाइँ सर्न समेत बाध्य बनेका छन् ।
