२४ कात्तिक, काठमाडौं । रिपब्लिकन पार्टीका डोनाल्ड ट्रम्प अमेरिकाको ४५ औं राष्ट्रपतिमा निर्वाचित भएका छन् ।
अब उनले एकसाताभित्र मन्त्रिपरिषद् गठन गर्नेछन् । र, विश्व समुदायको चासो ट्रम्पको विदेशमन्त्री को होलान् भन्ने छ । अन्तराष्ट्रिय सञ्चार माध्यमहरुका अनुसार ट्रम्पको विदेशमन्त्रीमा तीन अनुहार न्यूट गिङरिच, बब कोरकर र क्रिस क्रिष्टी छन् ।
जसमा न्यूट गिङरिचको सम्भावना बढी छ । न्यूट गिङरिच १९९५ देखि ९९ सम्म अमेरिकाको तल्लो सदनको ५० औं सभामुख पनि थिए । २०१२ मा राष्ट्रपतिको उम्मेदवार बन्ने दौडमा समेत रहेका उनी डोनाल्ड ट्रम्पको चुनावी अभियानका सल्लाहकार बने ।
भनिन्छ, ट्रम्पले उपराष्ट्रपतिका लागि छनौट गरेका तीन व्यक्तिमा उनको नाम पनि थियो । उनी सीमा सुरक्षा र अध्ययमनसम्वन्धी कडा नीति र गेष्ट वर्कर कार्यक्रमका पक्षपाति हुन्, जसअनुसार अमेरिकामा गएर विदेशीहरुले काम गर्न पाउँछन् । तर, नागरिकता पाउने छैनन् ।
कोर्कर रिपब्लिकन सिनेटर हुन् । उनी अमेरिकी सिनेटको अन्तराष्ट्रिय सम्वन्ध समितिको सभापति पनि हुन् ।
उनले ट्रम्पलाई समर्थन गरेका छन् । उनले बेलाबखतमा ट्रम्पको समर्थनमा कडा अभिव्यक्तिसमेत दिँदै आएका थिए । कोर्करले रिपब्लिकन पार्टीको अधिवेशनका क्रममा अमेरिकाको क्लिभल्याण्डमा जम्मा भएका विदेशी राजदूतहरुसँग हिमचिम बढाइरहेको देखिएको थियो ।
उनले इराक युद्धको पक्षमा बोल्दै आएका छन् । तर, अफगानबारे रणनीतिलाई लिएर उनले २००९ मा तत्कालीन राष्ट्रपति बाराक ओबामाको आलोचना गरेका थिए ।
अर्का सम्भावित विदेशमन्त्री क्रिस क्रिष्टी हुन् । उनी न्यूजर्सीका गभर्नर समेत हुन् । अवैधानिक रुपमा अमेरिकामा बसेकाहरुलाई वैधानिक बनाउनु गलत भएको उनको मत छ ।
उनको भनाइमा कागजपत्र नभएका आप्रवासीहरु अपराधी होइनन्् तर, डिपोर्ट गर्दा पनि आउँछन् भने अपराधी हो । स्थानीय अधिकारीहरुलाई अध्यागमन कानून लागू गर्ने अधिकार दिनु गलत भएको उनको मत छ । सन् २०१३ मा उनले गैरकानुनी रुपमा बसेका आप्रवासीहरुले कम्तिमा तीन वर्षसम्म न्यूजर्सीमा हाइस्कुलसम्म अध्ययन गर्न पाउने निर्णय गरेका थिए ।