चलचित्र ‘सुश्री’मा नायिकाको भूमिका निर्वाहा गरेपछि जर्मनीमा बस्दै आएकी आशिका तामाङलाई दर्शकले नजिकबाट चिन्ने मौका पाए । हुनत, यो चलचित्रले बक्स अफिसमा कुनै कमाल गरेन । तर, आशिकाले चलचित्रबाट धेरै कुरा सिक्ने मौका पाइन् ।
जर्मनीमा नर्स पेशा अपनाउँदै आएकी आशिका समय-समयमा नेपाल आउँछिन् र समाजसेवा पनि गर्छिन् । आफूलाई कला क्षेत्र र समाजसेवामा रुची भएको उनको भनाई छ ।
आशिकासँग गरिएको भिडियो कुराकानी यहाँ हेर्नुहोस्ः
‘सुश्री’मा काम गरेपछि आफूलाई अभिनयको निकै कम ज्ञान भएको उनले वुझिन् । यसपछि, आशिकाले दोश्रो चलचित्रमा काम गर्न हतार गरेकी छैनन् । चलचित्रमा काम गर्नु अगाडिसम्म उनलाई आफूमा अभिनयको खानी नै भएको जस्तो लाग्थ्यो । तर, चलचित्र रिलिज भएपछि उनी सपनाबाट ब्यूझिइन् ।
उनलाई नेपाली चलचित्रलाई विश्व बजारमा पुर्याउने खालका चलचित्रमा काम गर्न मन छ । यसका लागि आफूले तयारी गरेको उनको भनाई छ । आशिका आफूलाई आफू नराम्री लाग्ने बताउँछिन् ।
अनलाइनखबरको ‘फ्रेस फेस’ स्तम्भमा रहेर कुरा गर्ने क्रममा यी सुन्दरीले नलुकाइ धेरै कुरा स्पष्ट भनिन् । उनले आफू १० प्रतिशत मात्र राम्री रहेको बताइन् । तपाइको अनुहारको कुन अंग राम्रो छ भन्दा, उनले कुनै पनि छैन भनिन् । तर, आफ्नो मुस्कान केहि हदसम्म राम्रो भएको उनको तर्क छ ।
नेपाली चलचित्रका सबै कलाकारसँग काम गर्न मन लागेको सुनाउने यी सुन्दरी आफू नायिका भन्दा पनि कलाकार बन्न चाहेको बताउँछिन् । तपाइको शरीरको कुन अंग राम्रो छ भन्ने प्रश्नमा उनले भनिन्-‘हुनत, सबै महिलालाई आफ्नो अंग बबाल नै लाग्छ । तर, मलाई मेरो शरीर मन पर्दैन ।’
फेसबुकमा ‘आइ लभ यू’ भन्ने धेरै भएपनि आफूलाई कुनै जवाफ नदिने गरेको उनको तर्क छ ।
