११ माघ, काठमाडौं । सेयर बजारमा एउटै व्यक्ति कार्यकारी प्रमुखको रुपमा रहेर २० वटासम्म लगानी कम्पनीहरु मार्फत् धितोपत्र कारोबार गरिरहेको पाइएको छ । नेपाल धितोपत्र बोर्डले गरेको लगानी कम्पनीको स्थिती सम्बन्धी प्रारम्भिक अध्ययनले यस्तो देखाएको हो ।

अध्ययनबाट बजारमा हाल १ हजारको संख्यामा निजी लगानी कम्पनीहरु रहेको देखिएको छ । यस्ता अधिकांश कम्पनीहरुको लगानीको उद्देश्य फरक भएपनि  धितोपत्र बजारमा लगानी गरिरहेको देखिएको छ । धितोपत्र बजारमा लगानी गर्ने उद्देश्य सहित स्थापना भएका कम्पनीहरु भने करिब एक तिहाई (३ सय) को हाराहारीमा मात्र रहेको प्रारम्भिक अध्ययनले देखाएको छ ।

बोर्डले लगानी कम्पनीको थप अध्ययन गरी यस्ता कम्पनीहरुलाई पुँजीबजारको नियमन दायरामा ल्याउन सहज हुने र यसबाट लगानी कम्पनीहरुको गतिविधी समेत पारदर्शी भर्ई दोस्रो बजार थप व्यवस्थित रुपमा विकास तथा विस्तार हुने बोर्डले अपेक्षा गरेको छ ।