२० पुस काठमाडौं । नेपाल एसोसियसन अफ ट्राभल एण्ड टुर्स एजेन्ट्स (नाट्टा ) ले यही पुस २८ गते नयाँ कार्य समिति चयन गर्ने भएको छ । अध्यक्ष पदका लागि वर्तमान प्रथम उपाध्यक्ष चेतनारायण पाण्डे र पुर्व महासचिव अच्युत गुरागाईले आफ्नो उमेदवारी घोषणा गरिसकेका छन् । तर उनीहरुको प्यानलसहितको टिम भने अहिलेसम्म घोषणा भएको छैन ।
नाट्टामा एक कार्यसमितिको अवधि २ वर्षको रहने गर्छ । गत सन् २०१६ मा चयन भएको कार्यसमितिको कार्यकाल सकिन लागेकाले नयाँ कार्यसमिति चयन गर्नका लािग यही पुस २८ गते चुनाव हुन लागेको हो ।
अध्यक्षका उमेदवार पाण्डे सन् २०१४ मा द्वितीय उपाध्यक्षमा निर्वाचित भएका थिए । उनीसम्राट टर्स एण्ड ट्राभल कम्पनीका सञ्चालक हुन् । साथै उनी पोखरा र चितवनमा रहेको ल्यान्डमार्क होटलका पनि सञ्चालक हुन् ।
नेपाल कम्युनिष्ट पार्टि (एमाले ) सँग निकट रहेका पाण्डलेे करिब २७ वर्ष देखि पर्यटन क्षेत्रसँग सम्बन्धित रहेर व्यवसाय गरिरहेका छन् ।
पाण्डे अहिले ट्राभल एण्ड टुर्स क्षेत्रमा अनाधिकृत रुपमा रोक्ने आफ्नो पहिलो एजेन्डा रहेको बताउँछन् । साथै यो क्षेत्रलाई पर्यटन उद्योगको रुपमा विकास गर्न आवश्यक कानुन निर्माणको लागि पहल गर्ने उनको योजना छ । दुई वर्षे नयाँ कार्यकालमा प्रबर्द्धनात्मक कार्यक्रम गर्ने पनि उनको प्राथमिकतामा नै छ ।
त्यस्तै अध्यक्षका अर्का उमेदवार गुरागाई सी एण्ड स्काई ट्राभल एण्ड टुर्सका सञ्चालक हुन् । उनी सन् २०११ मा महासचिवमा नियुक्त भएका थिए ।
साथै गुरागाई नेपाली कांग्रेससँग निकट रहेको मानिन्छ । टिकेटिङ सिस्टम सुधार्ने र नाट्टामा हल समेत निर्माण गर्ने उनको योजना रहेको छ ।
