दिल्लीबाट यसरी काठमाडौं आइपुग्छ लागूऔषध

२३ फागुन, काठमाडौं । पछिल्लो समय काठमाडौं लागूऔषध प्रयोगकर्ताको संख्या बढ्दो छ । प्रहरीले बेलाबेला डाइजाल्याप, फेनारागन, प्राक्सिभोन जस्ता लागूऔषध अवैध रुपमा भित्र्याउनेहरुलाई थानकोट नाकामा पक्राउ पनि गरेको हो ।

तर, यसपटक भने लागूऔषध तस्करीको नाइकेसम्म पुगेको प्रहरीले दाबी गरेको छ ।

जनसेवा प्रहरीले भारतीय नागरिकसहित तीन जनलाई पक्राउ परेको छ । उनीहरु लागूऔषध आसार्ने र डिलरबाला हुन् तर, मुख्य कारोबारी भने उम्किएका छन् ।

प्रयोगकर्तामार्फत यसरी खुल्यो नेक्सस

औषध प्रयोगकर्ता बढेको गुनासो आएपछि महानगरीय प्रहरी परिसर, काठमाडौंका प्रमुख विश्वराज पोखरेलले जनसेवाका डिएसपी टेकुनन्द लिम्बुलाई लागूऔषध प्रयोगकर्ता र ओसारपसारमा संलग्नमाथि कडा निगरानी गर्न निर्देशन दिए ।

त्यसको केही दिनमा नै परोपकार क्षेत्रबाट एक जना लागूऔषध प्रयोगकर्ता पक्राउ परे । प्रहरीले उनलाई सार्वजनिक गरेन, बरु उनको माध्यमबाट नेक्सस खोजी गर्न थाल्यो ।

सुरुमा उनलाई लागूऔषध बेच्नेलाई पक्राउ गर्‍यो । विस्तारै लागूऔषध कारोबारको अन्य लेयर पहिचान गर्दै अघि बढ्यो । अनुसन्धान गर्दै जाँदा जनसेवा प्रहरी काठमाडौंमा लागूऔषध विक्री गर्ने डिलरकै सञ्चालकसम्म पुग्न सफल भयो ।

नुवाकोटको तलाखु–९ घर भइ काठमाडौं–२१ जैसिदेवल बस्दै आएका २५ वर्षीय सुनिल घिमिरे पक्राउ परे । उनी लागूअाैषधको डिलर नै सञ्चालन गर्छन् । उनको साथबाट डाइजाल्याप, नुफिन र फेनारगन गरी २०३ सेट लागूऔषध बरामद भयो, जसको बजार मूल्य झण्डै साढे २ लाख छ ।

बयानका क्रममा घिमिरेले दुई जना व्यक्ति डेलिभरी लिएर बुधबार काठमाडौं आउँदै गरेको सूचना चुहाए । अन्ततः मंगलबार भारतको दरभंगाका २६ वर्षीय महम्मद रीयाजुदिन र बाराको गढिमाई नगरपालिका घर भइ काठमाडौं बस्दै आएका ३३ वर्षीय विगु रायभरलाई नियन्त्रणमा लिन प्रहरी सफल भयो ।

उनीहरु लागूऔषधको मुख्य कारोबारी भने होइनन् । वीरगञ्जको रक्सौल नाकाबाट लागूऔषध काठमाडौंसम्म ल्याउने र सम्बन्धित ठाउँमा डेलिभरी गर्ने जिम्मेवारी उनीहरुको हो । त्यसबापत प्रत्येक खेपमा २० हजार रुपैयाँ पाउँथे ।

दिल्ली–रक्सौल–काठमाडौं रुट

अनुसन्धानमा संलग्न प्रहरी अधिकारीका अनुसारे लागूऔषध तस्करीका लागि भारतको नयाँ दिल्ली, रक्सौल हुँदै काठमाडौंसम्मको रुट प्रयोग गरेको खुलेको छ ।

सीमानाका वीरगञ्ज पारिपट्टीको भारतीय शहर रक्सौलमा मामा नाम गरेका एक व्यक्ति छन्, जसले नयाँ दिल्लीबाट आउने ‘कन्साइन्मेन्ट’ लाई रिभिस गर्छन् ।

उनैले नेपाल पठाउने गर्छन् । सोमबार उनले वीरगञ्जबाट काठमाडौं ‘कन्साइन्मेन्ट’ पठाउने तयारी गरेका थिए । त्यसका लागि विगु र महम्मदलाई जिम्मेवारी सुम्पिए ।

दुई जनाले सोमबारै नाइट बसमा डाइजाल्याप, नुफिन र फेनारागन एक हजार ६ सय सेट, गाँजा चिपड ११ प्याकेट (हरेकमा १ सय ग्राम) र गाँजा पेल्ने सानो हाते मेसिनलाई लुकाएर राखे । र, आफूहरु चाहिँ अर्कै गाडीमा चढे ।

मंगलबार उनीहरु कलंकीमा ओर्लिएर सामान भएको गाडीमा पुगे । र, भेला पारेर तत्काल काठमाडौंका विभिन्न क्षेत्रमा रहेका डिलरहरुमा डेलिभरी गर्ने तयारी थाले ।

तर, उनीहरु लागूऔषध आउँदै गरेको सुराक प्रहरीलाई प्राप्त भइसकेको थियो र दुवै प्रहरीको फन्दामा परे ।

मुख्य कारोबारी उम्किए

प्रहरी स्रोतका अनुसार वीरगञ्जबाट काठमाडौं भित्रिएको लागूऔषधको मुख्य कारोबारी मामा नामक व्यक्ति नै हुन् ।

तर, उनको बारेमा विस्तृत विवरण हात पार्न प्रहरी अहिलेसम्म असफल देखिन्छ । स्रोतका अनुसार उनी पनि मंगलबार काठमाडौंमै थिए । तर, पक्राउ गर्न प्रहरी चुक्यो ।

‘पक्राउ परेका तीन जना मध्येका एकले उनी मंगलबार पैसा लिन काठमाडौं आएको बताएका थिए’, एक प्रहरी अधिकारीले अनलाइनखबरसँग भने । मामा नाम गरेका मुख्य कारोबारीका बारेमा प्रहरीले अहिले थप अनुसन्धान थालेको छ ।

तस्करीको नयाँ शैली

लागूऔषध लुकाउन नयाँ शैली अपनाएको खुलेको छ । काठमाडौं प्रहरी प्रमुख विश्वराज पोखरेलका अनुसार उनीहरुले ग्रिजको बट्टाभित्र हालेर लागूऔषध लुकाएका थिए ।

‘ग्रिजको बाल्टिनमा माथि पट्टी ग्रिज र तलपट्टी लागूऔषध राखेर प्रहरीलाई छक्याउँदै काठमाडौंसम्म लागूऔषध ल्याइने गरेको भेटिएको छ’, उनले भने, ‘यो लागूऔषध तस्करीको नयाँ शैली हो ।’

उनीहरुले टर्बो प्लस ग्रिज लेखिएको १८ केजीको बाल्टीमा डाइजाल्याप, नुफिन र फेनारागन १००० सेट, ५ केजीको दुई वटा बाल्टीमा २५०/२५० सेट र ज्रेबाको झोलामा लुकाएर १०० सेट लागूऔषध काठमाडौं ल्याएका थिए ।

सामान्य अवस्थमा प्रतिसेट १ हजार रुपैयाँदेखि १५ सय रुपैयाँसम्ममा यो लागूऔषध विक्री वितरण हुन्छ । तर, अभावमा दुई हजार रुपैयाँदेखि २५ सय रुपैयाँसम्म पर्छ ।

यसलाई आधार मान्दा प्रहरीले मंगलबार बरामद गरेको लागूऔषधको मूल्य २३ लाख रुपैयाँ पर्छ ।

पक्राउ परेका व्यक्तिहरुले ५/६ महिनाअघिबाट काठमाडौंसम्म लागूऔषध ल्याउने गरेको खुलेको छ, जुन प्लस टुको विद्यार्थीदेखि अन्य युवासम्मलाई विक्री गर्ने गरेका थिए ।

यो पनि पढ्नुस् 

नयाँ दिल्लीबाट नेपालमा लागूऔषध भित्र्याउने गिरोहका तीन जना समातिए

लागूऔषध कारोबारीको नयाँ काइदा, ग्रिजमा डुबाएर ओसारपसार