साइकलिङको माध्यमबाट सम्पदा पुनर्निर्माणमा हातेमालो

२४ साउन, काठमाडौं । भुइँचालोबाट प्रभावित सम्पदा क्षेत्र काष्ठमण्डप, बुङ्मती र खोकनाको पुनर्निर्माणमा साइक्लिङका माध्यमबाट हातेमालो गर्ने उद्देश्यले ‘राइड काष्ठमण्डप टु खोकना’ यस वर्ष पनि हुने भएको छ ।

गाईजात्राको छेकोमा हरेक वर्ष साइकल र्‍याली गरिन्छ । यस वर्ष आउँदो शनिबार अर्थात २६ साउनमा यसको चौथो संस्करण आयोजना गर्न लागिएको हो । साइकलिङमा करिब दुई सय जना माउण्टेन बाइकसहित सहभागी हुने आयोजक कन्सेप्ट नेपालका संयोजक पवन शाक्यले बताए ।

यसमा सहभागी हुन पाँच सय रुपैयाँ तिर्नु पर्छ । त्यो रकमले टिसर्ट र लन्च सुविधा पाइने शाक्यले जानकारी दिए ।

साइकलिङ यात्रामा खोकना र बुङ्मती घुम्न पाइन्छ । काठमाडौंको काष्ठमण्डपबाट कालीमाटी, बल्खु, चोभार, चाल्नाखेल, बुङ्मती हुँदै खोकनासम्म करिब २० किलोमिटरको दुरी छ । यसलाई ‘हेरिटेज राइड’का नाउँमा कन्सेप्ट नेपालले ब्राण्डिङ गरेको छ । उसले खोकना पुनर्निर्माण तथा पुनःस्थापना समितिसँगको सहकार्यमा ०७२ देखि साइक्लिङ इभेन्ट गर्दै आएको छ ।

साइक्लिङका लागि खोकना राम्रो गन्तव्य मानिन्छ । प्राचीन नेवार बस्ती र खेतीबालीका हरियाली हेर्दै साइकल कुदाउँदा बेग्लै आनन्द मिल्छ ।

खोकनामा नेवार र कन्टिनेन्टल परिकार पाक्ने खाजा घरहरु छन् । होटल तथा होमस्टे सुविधा भने छैन । बुङ्मतीमा चाहिँ होमस्टे गराइन्छ ।

‘अचेल विदेशीहरु पनि माउन्टेन बाइकमा खोकना आउन थालेका छन्,’, समितिका अध्यक्ष श्याम महर्जन भन्छन्, ‘त्यसैले पर्यटनबाट बढी भन्दा बढी फाइदा लिन हामी खोकनामा होमस्टे गराउने तयारीमा छौं ।’