३० पुस, काठमाडौं । अपर तामाकोशी हाइड्रोपावरको सेयर कारोबार रद्द गरिएको छ । अस्वभाविक तरिकाले अपर तामाकोशीको सेयर कारोबार बढेको भन्दै नेपाल स्टक एक्सचेञ्ज (नेप्से) ले कारोबार रद्द गरेको हो ।
कम्पनीको सोमबार एकैदिन ५० प्रतिशत अर्थात एकसय १२ रुपैयाँले सेयर मूल्य बढेको थियो । २ सय २४ रुपैयाँबाट ५० प्रतिशत बढेर ३ सय ३६ रुपैयाँ सेयर मूल्य बढेपछि नेप्सेले कारोबार रद्द गरेको हो ।
अस्वभाविक तरिकाले मूल्य बढेपछि कारोबार रद्द गर्नु परेको नेप्सेले जनाएको छ । नेप्सेद्वारा जारी सूचनामा भनिएको छ, ‘प्राविधिक कारणले आज मिति २०७५/०९/३० गते रेन्जभन्दा बाहिर गएर भएको माथिल्लो तामाकोसी जलविद्युत कम्पनी लिमिटेडको कारोबार रद्द गरिएको छ ।’
नेप्सेले कारोबार रद्द गरेको जानकारी दिए पनि वेबसाइटमा कम्पनीको सेयर मूल्य भने ३ सय ३६ रुपैयाँ देखाइरहेको छ ।
