१४ फागुन, काठमाडौं । मंगलबार सेयर बजार राताम्मे देखिएकाे छ । सेयर बजारमा कारोबार हुने सबै समूह राताम्मे देखिँदा कारोबार मापक नेप्से परिसूचकमा ७ अंक भन्दा बढीको गिरावट आएको छ ।
मंगलबार ७ दशमलव १७ अंकको गिरावट आएर नेप्से परिसूचक १ हजार १ सय २ दशमलव ५६ अंकमा झरेको छ । यस अघि साताको पहिलो दिन बजार दोहोरो अंकले घटेको थियो भने दोस्रो दिन सोमबार ७ अंक भन्दा बढीको सुधार आएको थियो ।
सोमबार सुधार भएको बजार मंगलबार पुनः ओरालो लागेको हो । नेप्से परिसूचकसँगै कारोबार रकममा समेत गिरावट आएको छ ।
मंगलबार भएका ३ हजार ६ सय ८१ कारोबारबाट १ सय ६५ कम्पनीका ६ लाख ५३ हजार २८ कित्ता सेयर किनबेच भएका छन् । जसअनुसार कारोबार रकम १६ करोड ५६ लाख ७२ हजार २ सय ८५ रुपैयाँको कारोबार भएको नेपाल स्टक एक्सचेञ्जले जनाएको छ ।
सोमबारको तुलनामा कारोबार रकम झण्डै ४ करोडले कम हो । सोमबार २० करोड भन्दा माथिको कारोबार भएको थियो ।
कारोबार रकमका आधारमा मंगलबार माथिल्लो तामाकोशी जलविद्युत् आयोजना पहिलो नम्बरमा देखिएको छ । माथिल्लो तामाकोशीको ७५ लाख भन्दा बढीको कारोबार भएको छ ।
