चलचित्र ‘ए मेरो हजुर ३’मा नायिका सुहाना थापालाई निर्देशक झरना थापाले फाइनल गर्दा धेरैले टिप्पणी गरे, ‘छोरीलाई नायक अनमोल केसीको नायिका बनाएर हिट बनाउने दाउमा झरना लागिछन् ।’
सुहाना र अनमोलसँग गरिएको भिडियो कुराकानी यहाँ हेर्नुहोस्ः
अनमोल केसीलाई फाइनल गरेपछि झरनाले सुहानालाई फोन गरेर चलचित्रमा तिमी पनि छौं है भनेकी रहिछन् । के अनमोल केसीको साहारामा तपाइले सुरक्षित प्रवेशको बाटो खोज्नुभएको हो, अनलाइनखबरको प्रश्नमा सुहानाले भनिन्–‘मलाई कसैले त्यस्तो भन्दा दुःख लाग्दैन । किनकी, चलचित्रमा अनमोल हुनु र मेरो आफ्नै प्रोडक्शन हाउस हुनु मेरा लागि ठूलो कुरा हो ।’ उनले यो ब्रान्ड र यो स्कुलिङले आफूलाई फाइदा हुने समेत स्पष्ट पारिन् ।
सुहाना भन्छिन्–‘अहिले म जे छु अनमोल केसी र मेरो ममी झरना थापाकै नामबाट छु । यो बाहेक अहिले मेरो केही पनि छैन ।’ चलचित्र रिलिज भएपछि झरनाकी छोरी, अनमोलकी हिरोइन भन्ने ट्यागबाट अलग हुनुहुन्छ त भन्ने प्रश्नमा भगवान् कृष्णकी भक्त सुहानाले भनिन्–‘त्यो त भगवान् कृष्ण र दर्शकहरुको हातमा छ । म त केही पनि भन्न सक्दिनँ ।’
सुहानाले आफू वास्तविक जीवनमा पनि अनमोल केसीको फ्यान भएको बताइन् । अनमोल केसीको चलचित्र ‘होस्टेल’ आएपछि नै आफूले नेपाली चलचित्र हेर्न थालेको सुहानाको भनाई थियो । चैत्र २९ गतेबाट रिलिज हुन लागेको चलचित्रलाई लिएर सुहाना उत्साहित देखिएकी छिन् ।