२०७६ जेठ १७ गते १६:२७ 
१७ जेठ, काठमाडौं । प्रधानमन्त्री कप क्रिकेट प्रतियोगितामा प्रदेश १ ले पहिलो जित दर्ता गरेको छ ।
त्रिवि क्रिकेट मैदानमा शुक्रबार भएको खेलमा प्रदेश एकले कर्णाली प्रदेशलाई १८१ रनले पराजित गरेको हो । २२९ रनको चुनौती पछ्याउँदै ब्याटिङ गरेको कर्णालीले २०.१ ओभरमा सबै विकेट गुमाएर ४७ रन मात्रै बनाउन सक्यो । यो स्कोर प्रधानमन्त्री कपकै सबैभन्दा कम अंकको हो । ।
कर्णाली प्रदेशका निश्चल रावलले १७ रन बनाउनुबाहेक अन्य खेलाडीले दोहोरो अंकको रन छुन सकेनन् । कर्णाली प्रदेशलाई सस्तैमा समेट्ने क्रममा प्रदेश १ का तर्फबाट ६ विकेट लिने पुष्प थापा नायक बने । ९.१ ओभर बलिङ गर्दै एक ओभर मेडन राखेर उनले १९ रन खर्चिदै ६ विकेट लिन सफल भएका हुन् । त्यस्तै, मुकुन्द यादवले तीन विकेट लिए ।
टस हारेर पहिले ब्याटिङ गरेको प्रदेश १ ले निर्धारित ५० ओभर ८ विकेटको क्षतिमा २२८ रन बनाएको थियो । प्रदेश एकका लागि सिद्धान्त लोहनीले ६३ रन बनाए । त्यस्तै, फिर्दोस अन्सारीले अविजित ४५ रन बनाउँदा सन्नी पुनले ३४ रन बनाए ।
प्रतिक्रिया 4