१० भदौ, वीरगंज । जीर्ण सडक मर्मतको माग गर्दै वीरगञ्जमा मंगलबार साँझ प्रदशर्न भएको छ ।
नेपाल विद्यार्थी (नेवि )संघसँग आवद्ध युवा विद्यार्थीले सडकको दुरावस्थाले दुर्घटनाको जोखिम बढेको भन्दै वीरगंजको श्रीपुरमा प्रदर्शन गरेका हुन ।
विरोधको क्रममा उनीहरुले वीरगञ्ज महानगरपालिकाका प्रमुख विजय कुमार सरावगीको विरोधमा नाराबाजी समेत गरेका थिए ।
विरोध प्रदर्शनका कारण त्रिभुवन राजपथ अन्तर्गत पर्ने वीरगंजको मुख्य सडकमा सवारी आवागमन ठप्प हुँदा केहीबेर सवारीको जाम लागेको थियो ।
वीरगंजको मुख्य बजार क्षेत्र हुँदै निस्केको सडक जीर्ण छ । विशेषगरि पावरहाउसदेखि घण्टाघर र छपकैयादेखि मितेरी पुलसम्मको सडकखण्डको अवस्था राम्रो छैन ।
मुख्य सडक जीर्ण हुँदा पनि मर्मत नगरी सरोकारवाला मौन बसेकोले विरोध गर्नुपरेको नेवि संघ पर्साका सचिव समिर मन्सुरीले बताए ।
वीरगञ्जकै जितेन्द्र पटेलले सडकको दुराअवस्थाका कारण विरामीलाई एम्बुलेन्समा अस्पताल लैजाँदा समेत बाटोमै ज्यान जाने हो कि भन्ने डर रहेको बताए ।
पछिल्लो दुई बर्षमा दुईपटक यो सडक टालटुल भईसकेको छ ।
