चितवन मेडिकल कलेजले भन्यो-राजनीतिक अभिष्ट पूरा गर्न आन्दोलन

१ असोज, चितवन । शूल्क सम्बन्धी विषयलाई लिएर चितवन मेडिकल कलेजमा विद्यार्थीले गरिरहेको आन्दोलनलाई कलेज प्रशासनले राजनीतिक अभिष्ट पूरा गर्न गरिएको आन्दोलनको संज्ञा दिएको छ ।

आन्दोलरत विद्यार्थीहरुले दोस्रो चरणको आन्दोलन घोषणा गरेको भोलीपल्टै वुधवार कलेजमा पत्रकार सम्मेलनको आयोजना गरी कलेज प्रसासनले कसैको राजनीतिक अभिष्ट पूरा गर्न र राजनीतिक रुपमा स्थापित हुने भर्‍याङका रुपमा आन्दोलन गरिएको जनाएको छ ।

यो पनि पढ्नुहोस

चितवन मेडिकल कलेजका विद्यार्थीद्वारा आन्दोलन चर्काउने घोषणा

कलेजले सार्वजनिक गरेको धारणा सरकारद्धारा प्रतिवन्धित नेकपाका महासचिव नेत्रविक्रम चन्दका छोरा प्रकाश चन्दप्रति लक्षित देखिन्छ । उनकै अगुवाईमा गत भदौ १५ गतेदेखि चितवन मेडिकल कलेजमा अतिरिक्त शुल्क समायोजन वा फिर्ताको माग गर्दै आन्दोलन भैरहेको छ ।

पत्रकार सम्मेलतमा बाँडिएको विज्ञप्तीमा कलेजले भनेको छ ‘सरकार र सरकारी निकायसँग सम्बन्धित मागहरू उठाएर एउटा निश्चित मेडिकल कलेजलाई दुःख दिनु आफैमा कतिसम्म न्यायोचित छ ? आन्दोलनका नाममा विद्यार्थीहरुको पठन–पाठन ठप्प बनाइनु, बिरामीहरूको उपचार गराउन पाउने अधिकारलाई थुनछेक गर्न खोज्नु आफैंमा गैरकानुनी कार्य हुन् ।’

यो पनि पढ्नुहोस

मेडिकल कलेजमा शुल्क विवादको भित्री कथा

सरकारले तोकिएको मापदण्डभित्र रहेर नै शुल्क उठाएको दाबी कलेजले गरेको छ । कलेजका प्रमुख प्रशासक प्रताप देवकोटाले विद्यार्थीहरुले उठाएको इन्टर्नसिप भत्ताको माग कलेजले पूरा गरिसकेकोले आन्दोलनको औचित्य नभएको बताए । ‘हामीसँग सम्बन्धित माग पूरा गरीसकेको र बाँकी उहाँहरुका माग सरकार र उसका निकायसँग जोडिएका छन्,’ देवकोटाले भने, ‘शुल्क सम्बन्धी विवादका सम्बन्धमा सरकारद्धारा गठित संसदीय उपसमितिले बुझाएको प्रतिवेदन, त्रिभुवन विश्वविद्यालय, शिक्षा मन्त्रालयबाट निर्देशन भई आएका र आउने निति नियमको पूर्ण पालना गर्न तयार छौं ।

उनले विद्यार्थीका अन्य केही विषय भए आपसी वार्ता, छलफल र सहमतीबाट हल गर्न सकिने बताए । देशभरका मेडिकल कलेजहरुले एमबीबीएस अध्यापनमा सरकारले तोकिदिएको भन्दा बढी शुल्क लिँदै आएको विद्यार्थीहरुले गुनासो गर्दै आएका छन् ।

संविधान दिवसका अवसरमा निःशुल्क ओपिडी

चितवन मेडिकल कलेजले संविधान दिवसको अवसरमा असोज २ गते अस्पतालको ओपिडी सेवा निःशुल्क गर्ने जनाएको छ ।

कलेजका निर्देशक डा. दयाराम लम्सालले संविधान दिवसका दिनमा सरकारले सार्वजनिक विदा दिएकोले २ गते नै सेवा निःशुल्क गरिएको जानकारी दिए ।

सरकारको नीतिलाई अनुशरण गर्दै ओपीडी सेवाका लागि टिकट निःशुल्क गरिएको डा. लम्सालले बताए । सरकारले २ गते ओपिडी सेवा निशुल्क गर्ने घोषणा गरेको छ ।