१० असोज, विराटनगर । समानन्द यादव हत्या प्रकरणको बहसका लागि अदालत आउँदै गरेका पीडित परिवार बाटोमै कुटिएका छन् । हत्या प्रकरणको थुनछेक बहसका लागि विराटनगर- १४ स्थित घरबाट जिल्ला अदालत आउँदै गरेका गरेका पीडित परिवारका सदस्य बाटोमै कुटिएका हुन् ।
समानन्द हत्या प्रकरणमा फरार रहेका विराटनगर-१४ का वडाध्यक्ष बलदेव यादवका आफन्तहरुले सामानन्दकी श्रीमती किन्दुलादेवी यादवमाथि बाटो छेकेर कुटपिट गरेका हुन् ।
मुद्दाको बहस सुन्न आउँदै गर्दा बाटो छेकेर आफूमाथि कुटपिट भएको यादवले गुनासो गरिन् । वडाध्यक्ष बलदेव यादव मृतक समानन्द यादव एकै गाउँका हुन् ।
बाटो छेकेर कुटपिट गरेकाहरुले अदालत परिसरमा पनि समानन्दको श्रीमतीमाथि कुटपिट गर्ने प्रयास गरेका थिए । दुई पक्षबीच झडप हुने स्थिति आएपछि प्रहरीले दुबै पक्षलाई रोकेको थियो ।
तीन वडा अध्यक्षसहित ९ जनाविरुद्ध म्याद
समानन्द हत्या प्रकरणमा फरार रहेका तीन वडा अध्यक्षसहित नौंजनालाई अदालतले २१ दिने म्याद जारी गरेको छ । न्यायाधीस राजकुमार कोइरालाको इजलासले पक्राउ पूर्जीसहितको २१ दिने म्याद जारी गरेको हो ।
यादव हत्या प्रकरणमा विराटनगर महानगरपालिका-१४ नम्बर वडाध्यक्ष बलदेव यादव, उनका छोरा रवीन, विराटनगर- १८ का अध्यक्ष सञ्जय शाह र जहदा गाउँपालिका-१ नम्बर वडाध्यक्ष प्रदीपचन्द यादव, विन्देश्वर यादव, सम्भुप्रसाद यादव, भोलु यादव, विरेश यादव, दिनेशप्रसाद यादवलाई प्रतिबादी बनाएर मुद्दा दायर गरिएको छ ।
तर, समाजवादी पार्टीबाट वडाध्यक्षमा निर्वाचित भएका पहुँचवाला वडाध्यक्षसहित अन्य व्यक्ति भने फरार छन् । वडा अध्यक्ष बलदेवका भतिज दिपेश यादव प्रहरी हिरासतमा छन् ।
विवाहको विषयमा विवाद हुँदा जेठ ३२ गते वडाध्यक्ष बलदेव यादवको घरमा बसेको पञ्चायतीमा विराटनगर-१४ का ५५ वर्षीय समानन्द यादवमाथि निर्घात कुटपिट भएको थियो । कुटपिटघाट घाइते यादवको असार २७ गते मृत्यु भएको थियो ।
यो पनि पढ्नुहोससांसदको रोहवरमा हत्याको आरोपी प्रहरी कार्यालयमा, वडाध्यक्षसहित ८ फरार
यो पनि पढ्नुहोसहत्या आरोप लागेपछि एक महिनादेखि ३ वडाअध्यक्ष फरार
