अतिरिक्त शुल्क फिर्ता गर्न सीएमसीलाई २४ घण्टे अल्टिमेटम

१२ असोज, चितवन । अतिरिक्त शुल्क सहमति अनुसार फिर्ता नगरेको भन्दै चितवन मेडिकल कलेजमा अध्ययनरत विद्यार्थी र अभिभावकले २४ घण्टे अल्टिमेटम दिएका छन् ।

गत असोज ४ गते जिल्ला प्रशासन कार्यालय चितवनमा भएको सहमति अनुसार असोज १० गतेसम्म कलेजले लिएको भनिएको अतिरिक्त शुल्कको भर्पाइ रसिद दिने र सोबारेको प्रतिवेदन बनाउने भन्ने उल्लेख छ । तर, सो बमोजिम कलेज प्रशासनले रसिद नदिएको र प्रतिवेदन पनि तयार नभएको भन्दै विद्यार्थी र अभिभावकले संयुक्त रुपमा आइतबार विज्ञप्ती जारी गरि २४ घण्टा भित्र माग पूरा नभए आन्दोलन गर्ने चेतावनी दिएका छन् । जारी विज्ञप्तीमा चितवन मेडिकल कलेजका प्रतिनिधीहरुले भर्पाइ नदिने, प्रतिवदेन तयार पार्ने काममा आलटाल, ढिलासुस्ती र अवरोध सिर्जना गर्ने, नाजायज विवाद उठाउने गरेको कारण समयमा नै प्रतिवदेन तयार हुन नसकेको आरोप लगाइएको छ ।

यो पनि पढ्नुहोस

सीएमसी कलेज र आन्दोलनरत विद्यार्थीबीच सहमति

चिकित्सा शिक्षा संर्घष समितिका संयोजक प्रकाश चन्द र अभिभावक संघर्ष समितिका अध्यक्ष निर्मला कँडेलले संयुक्त रुपमा जारी गरेको विज्ञप्तीमा भनिएको छ ‘अवैध लिएको रकम फिर्ता नभइञ्जेल आन्दोलनलाई जारी राख्ने छौं ।’

माग पूरा नभए असोज १३ गते विहान ११ बजेबाट विद्यार्थी, नागरिक समाज र अभिभावकहरुको संयुक्त बिरोधसभा गरी आन्दोलन सुरु गर्ने विद्यार्थीको रहेको चिकित्सा शिक्षा संर्घष समितिका संयोजक प्रकाश चन्दले बताए ।

तयार भएन प्रतिवदेन

भदौ १५ गतेबाट आन्दोलन थालेका विद्यार्थी, स्थानीय प्रशासन र कलेज प्रशासनका बीचमा गत असोज ४ गते समस्या समाधान गर्ने भन्दै जिल्ला प्रशासन कार्यालय चितवनमा भएको छलफलमा शुल्क फिर्तासम्बन्धी अध्ययन गरि प्रतिवेदन पेश गर्न सात सदस्यीय समिति बनेको बन्यो । असोज १० गतेभित्र प्रतिवेदन तयार गर्ने गरी दिइएको समयसिमा कट्दा पनि प्रतिवेदन तयार भएन ।

यो पनि पढ्नुहोस

सरकार भर्सेस निजी मेडिकल कलेज: के होला विद्यार्थीको भविश्य ?

तोकिएको समय भित्र प्रतिवेदन तयार नभएपछि पुनः तीन दिनको समय थप गरिएको छ । थपिएको तीन दिनको समय सिमा पनि असोज १३ गते सकिदै छ । समितिका संयोजक टेकप्रसाद चापागाईले प्रतिवेदन तयारीमा ढिला भैरहेको स्वीकार गरे । विद्यार्थीहरुसँग बढी शुल्क दिएको रकमको भरपाई नपाएका कारणले समस्या भएको संयोजक चापागाईले बताए ।

यो पनि पढ्नुहोस

मेडिकल कलेजमा शुल्क विवादको भित्री कथा

अध्ययन समितिका सदस्यसमेत रहेका जिल्ला प्रशासन कार्यालय चितवनका शाखा अधिकृत दिवाकर पौडेलले कलेज प्रशासनले हिसाव देखाउन केही समय आवश्यक माग गरेकोले तीन दिन थपिएको बताए । उनले कलेजले एक आर्थिक वर्षको हिसाब देखाएको तर बाँकी तीन आर्थिक वर्षको हिसाव देखाउन नसकेको बताए ।

समितिको संयोजकमा अभिभावकको तर्फबाट टेकप्रसाद चापागाई, सदस्य विद्यार्थी सुकरात पौडेल, कला अधिकारी, कलेज व्यवस्थापका अरुण कोइराला, जिल्ला प्रशासनको तर्फबाट शाखा अधिकृत दिवाकर पौडेल र शिक्षा विकास तथा समन्वय एकाइबाट अधिकृत जानकी बराल र चितवन मेडिकल कलेजका लेखा शाखाका राम आशिष ठाकुर सदस्य सचिव रहेका छन् ।