काठमाडौं । भारतीय ब्याट्सम्यान रोहित शर्माले एउटै टेष्ट म्याचमा सबभन्दा बढी छक्काको रेकर्ड बनाएका छन् ।
टेष्ट म्याचमा आफ्नो प्रदर्शनलाई लिएर आलोचना खेपिरहेका रोहितले भारतीय पिच र दक्षिण आफ्रिकाको औसत बलिङकोे फाइदा उठाए । पहिलो पारीमा १७६ रन बनाएका उनले दोस्रो पारीमा १२७ रन हाने । यो उनको टेष्ट करियरको पाँचौं शतक हो ।
रोहितले पहिलो पारीमा छ छक्का हाने भने दोस्रो पारीमा सात । यससँगै उनी एक टेष्टमा सबभन्दा बढी छक्का हान्ने ब्याट्सम्यान बनेका छन् ।
उनले वसीम अकरमले १९९६ मा बनाएको एउटै टेष्टमा १२ छक्काको रेकर्ड तोडेका हुन् ।
साथै २०१५ मा अजिन्क्या रहानेपछि एक टेष्टको दुबै पारीमा शतक बनाउने भारतीय ब्याट्सम्यान समेत बनेका छन् ।
