सरकारले भन्यो : लिम्पयाधुरासँगै सुस्ताको विवाद पनि टुङ्गिन्छ

१२ मंसिर, काठमाडौं । सरकारका प्रवक्ता एवं सूचना तथा सञ्चारमन्त्री गोकुलप्रसाद बाँस्कोटाले सीमा समस्याको समाधान एकैपटक खोजिने बताएका छन् ।

‘कालापानी, लिपुलेकको प्रश्नै होइन, प्रश्न लिम्पयाधुराको हो । सिमा समस्या समाधानको विधि कुटनीतिक र राजनीतिक नै हो’ मन्त्रिपरिषद बैठकका निर्णय सार्वजनिक गर्न आयोजित नियमित पत्रकार सम्मेलनमा मन्त्री बाँस्कोटाले भने ।

सीमा समस्या समाधानका लागि नेपाल सरकारले भारत सरकारलाई कुटनीतिक नोटसमेत पठाइसकेको जानकारी दिँदै मन्त्री बास्कोटाले कुटनीतिक र राजनीतिक रुपमा लिम्पियाधुरासँगै सुस्ताको सिमा समस्याको पनि समाधान गरिने बताएका हुन् ।

‘कागजात जुटाएर तथ्यगत आधारमा भारतसँग कुरा गरेर लिम्पियाधुरा मात्रै होइन सुस्ताको विवाद पनि टुङग्याउँछ,’ मन्त्री बाँस्कोटाले भने । नवलपरासीको सुस्ताको सीमा नारायणी नदीले फेरिरहने बाटोले पनि समस्या भएको स्थानीयले बताउँदै आएका छन् ।

संसदको अन्तर्राष्ट्रिय सम्बन्ध समितिले पनि सबै क्षेत्रका सीमा विवाद एकै पटक हल गर्ने गरी पहल गर्न सरकारलाई निर्देश गरेको थियो ।

संसदको प्रत्यायोजित व्यवस्थापन तथा सरकारी आश्वासन समितिले नेपाल भारत सन्धीका सक्कल कपी नेपालसँग नरहेको पाइएको भन्दै निकालेको निश्कर्षको भने मन्त्री बास्कोटाले खण्डन गरेका थिए । ‘हामीले गरेका सन्धि/सम्झौताको सक्कल नै छैन भनेर निश्कर्ष निकाल्नु हतारको निर्णय हुन सक्छ’ बास्कोटा भन्छन्, ‘हामीसँग नभएपनि अन्य देशका म्युजियमहरुमा हुन सक्छ । त्यसको पनि खोजी गर्नुपर्छ ।’

मन्त्री बास्कोटाले सीमा समस्याबारे अध्ययन गर्न गठित समितिले तीन महिनाभित्र आफ्नो प्रतिवेदन दिने पनि बताएका छन् ।

सरकारले अघिल्लो हप्ता मात्रै सीमा विवाद हल गर्ने ‘नेपाल–भारत’ र ‘नेपाल–चीन’ सीमा निरीक्षण समिति गठन गर्ने निर्णय गरेको थियो । उक्त समितिले आगामी तीन महिनाभित्र आफ्नो प्रतिवेदन दिने मन्त्री बाँस्कोटाले बताए ।