१२ मंसिर, काठमाडौं । नेपाल भ्रमण वर्ष २०२० मा एक लाख पर्यटक भित्र्याउने घोषणा गरेको कर्णाली सरकारले काठमाडौंमा यसबारे छलफल सुरु गरेको छ ।
बिहीबार यस विषयमा कर्णाली प्रदेशका पर्यटनमन्त्री नन्दसिंह बुढासहितको टोलीले कर्णाली प्रदेशमा सञ्चालनमा रहेका विमान सेवा कम्पनी सञ्चालकसँग छलफल गरेको छ ।
कर्णालीका सबै जिल्लामा सडक नपुगेकाले यातायातको एकमात्र विकल्प हवाई यात्रा रहेको छ । त्यसैले यसलाई प्रभावकारी बनाउनेबारेमा छलफल गरेको मन्त्री बुढाले बताए । ‘कर्णालीको समृद्धीको आधार भनेको पर्यटन हो पर्यटनको प्रभावकारिता पहुँच र प्रचार प्रसार हो, यही कुरालाई ध्यान गरेर हामीले छलफल अघि बढाएका हौं’ उनले भने ।
छलफलमा सहभागी विमान सेवा कम्पनीसँगको छलफल सकारात्मक भएको मन्त्री बुढाले बताए ।
छलफलमा भिजिट नेपाल २०२० कर्णाली प्रदेश सयोजक राजु कार्की, पर्यटन सचिवव केदारबहादुर अधिकारी, पर्यटन ब्यवसायी तथा एयरलाइन्स कम्पनीका पदाधिकारी सहभागी थिए ।
