Comments Add Comment

वीरगञ्जमा निर्माणाधिन फोहोरमैला प्रशोधन केन्द्रमा ५ हजार विरुवा रोपिने

२२ मंसिर, वीरगञ्ज । वीरगञ्ज महानगरपालिका–१६ स्थित फोहोर मैला प्रशोधन केन्द्र परिसरमा ५ हजार विरुवा रोपिने भएको छ । प्रशोधन केन्द्र परिसरमा विरुवा लगाउन सुरु भइसकेको लायन्स क्लब अफ वीरगन्ज गेट्वेले जनाएको छ ।

शनिबार केन्द्र परिसरमा विभिन्न प्रजातिका ३ सय विरुवा रोपिएको छ । नगर प्रमुख विजय कुमार सरावगीले रुख रोपेर अभियानको शुभारम्भ गरेका थिए ।

पप्पु कन्स्ट्रक्सनको सहयोगमा लायन्सको वीरगञ्ज गेटवेले फोहोर प्रशोधन केन्द्र परिसरमा ५ हजार विरुवा रोप्नुको साथै संरक्षणको जिम्मा लिएको छ ।

प्रशोधन केन्द्रबाट निस्कने प्रदुषण घटाउन निम, लहरे पिपल, तुलसी लगायत बढी अक्सिजन दिने प्रजातिका वनस्पति रोपिने पप्पु कन्स्ट्रक्सनका सञ्जालक एवं क्लबका सचिव सुमित रौनियार बताउँछन् । ‘फोहोर मैला प्रशोधन केन्द्र वरपरको क्षेत्रलाई हरियो पार्कको रुपमा विकास गरौं भन्ने उद्देश्य हाम्रो छ ।’ उनले भने ।

विरुवा संरक्षणका लागि प्रत्येक साता लायन्सका प्रतिनीधि आउने र केही नर्सरीसँग समन्वय समेत गरिएको दाबी उनले गरे ।

वीरगञ्ज महानगरपालिकामा आधुनिक प्रकृतिको फोहोरमैला प्रशोधन केन्द्र निर्माणाधीन छ । ४७ करोड ६१ लाख ८० हजार रुपैयाँ लागतमा चिनियाँ निर्माण कम्पनी जन्डिङ इन्टरनेशनल इन्जिनियरिङले कामको जिम्मा लिएको हो । त्यसको स्थानीय प्रतिनीधिको रुपमा पप्पु कस्ट्रक्सनका रौनियारले नै काम हेरिरहेका छन् । ‘दुई साता भित्र उद्घाटन गर्नेगरी काम अघि बढीरहेको छ ।’ रौनियारले भने ।

वीरगञ्ज महानगरपालिकाको नगर सभाको पाँचौ आधिवेशनबाट पारित आर्थिक वर्ष ०७६/७७ को नीति, कार्यक्रम तथा बजेटमा वातावरण संरक्षणका लागि काम गर्ने उल्लेख छ । नगर प्रमुख सरावगीले आफ्नो कार्यकालमा महानगरमा १० लाख विरुवा रोप्ने बताउँदै आएका छन् ।

यो पनि पढ्नुहोस वीरगञ्जमा १० लाख विरुवा रोपिने

वृक्षारोपण तथा हरियाली प्रवर्द्धनमा जोड दिने नीति लिएको महानगरपालिकाले स्थानीय संघ संस्थाहरुलाई परिचालन गर्दै ऐलानी, पर्ती, नदि किनारका सार्वजनिक जग्गा तथा व्यक्तिको नीजि जग्गामा समेत वृक्षारोपण गर्ने जनाउँदै आएको छ ।

महानगरपालिकाले ‘एक घर दुई विरुवा कार्यक्रम’ अनिवार्य लागू गर्ने, घर निर्माण सम्पन्नताको प्रमाणपत्र लिनु अघि त्यसको जाँच गरेर मात्रै प्रमाणपत्र दिने नीति तथा कार्यक्रममा उल्लेख छ ।
नगर प्रमुख सरावगी घर वरपर जग्गा भएका नगरबासीले कम्तीमा ४ वटा विरुवा रोपेर सहयोग गर्नुपर्ने बताउँछन् ।

‘बढ्दो वायु प्रदुषणलाई नियन्त्रण गर्न वृक्षारोपणको विकल्प छैन । एक घर दुई विरुवा कार्यक्रम त अनिवार्य नै हो, तर हामीले ४ वटा विरुवा रोपेर सहयोग गर्न भनेका छौं ।’ नगर प्रमुख सरावगीले भने ‘ ऐलानी, पर्ती सार्वजनिक जग्गामा पनि वृक्षारोपण गर्ने योजना बनाएका छौं, त्यसका लागि विभिन्न संघ संस्थासँग समन्वय भइरहेको छ ।’

यो खबर पढेर तपाईलाई कस्तो महसुस भयो ?

ट्रेन्डिङ

Advertisment