२ पुस, पोखरा । पोखरामा जारी पोखरा प्रिमियर लिगको छैटौं खेलमा बिराटनगर टाइटन्सले पोखरा पल्टनलाई ४५ रनले हराएको छ । बिराटनगरले दिएको एक सय ४६ लक्ष्य पछ्याएको पोखरा १०० रनमा नै अलआउट भयो ।
पोखराले टस जितेर बिराटनगरलाई पहिलो ब्याटिङको निम्तो दिएको थियो । पोखराका ओपनरहरु सुनिल धमला र मुहम्मद जइद अलामले पहिलो विकेटका लागि अर्धशतकीय साझेदारी गरे । आलम २६ र धमला ३६ रन बनाएर आउट भए ।
तेस्रो नम्बरमा आएका कप्तान प्रदिप ऐरी चल्न सकेनन् । उनी ६ रन मात्र बनाउँदा रन आउट भए भने त्यसपछि आएका नोमन खानले पनि १ रन मात्र बनाउन सके । तर, पाचौं नम्बरमा आएका भारतीय ब्याट्सम्यान पुनित मेहराले विष्फोटक इनिङ खेले । उनले २६ बलमा ४ छक्का र ५ चौकाको मद्दतले अविजित ६१ रन बनाउँदै बिराटनगरलाई बलियो स्कोरसम्म पुर्याएका थिए ।
जवाफी ब्याटिङमा आएको पोखराले आक्रामक सुरुवात गरे पनि लगातार विकेट गुमाउँदै गयो । पोखराका कुशल भुर्तेलले १३ बलमा २४ रन बनाएर आउट भए भने अर्का ओपनर २२ बलमा १३ रन बनाए । चौथो नम्बरमा आएका रोहितकुमार पौडलले ३८ बलमा ३४ रन बनाए । अन्य ब्याट्सम्यानले दोहोरो अंकमा रहन बनाउन सकेनन् । कप्तान शरद भेषावकर शून्यमै आउट भएका थिए ।
बिराटनगरका बलर किशोर महतोले ३ विकेट लिए भने जितेन्द्र मुखिया र मोहम्मद जाइद आलमले २ विकेट हात पारे ।
यो पनि पढ्नुहोस ज्ञानेन्द्रको शतकसँगै काठमाडौंको पहिलो जित