६ फागुन, काठमाडौं । एउटा चर्चित अनि पुरानो गीत छ, ‘पशुपतिमा सुनैको गजुर…।’ गीतमा वर्णित पशुपतिनाथको यो गजुरको लामो इतिहास छ ।
धार्मिक र ऐतिहासिक महत्त्व बोकेको पशुपतिको गजुरजस्तै शिवलिंगको पिठिकासमेत अब भक्तजनबाट सहयोग मागेर सुनले सिंगारिने भएको छ । तर, पिठिकामा भने सुनको जलपमात्र हुनेछ ।
पिठिकामा हाल चाँदीको आवरणयुक्त जलहरी मात्रै छ । त्यसलाई हटाएर सुनको जलहरी बनाउन लागिएको हो ।
पशुपतिनाथका शिवलिंग अमूल्य धरोहरका रूपमा रहेकाले त्यसको संरक्षण र संवद्र्धनका निम्ति सुनको जलप लगाउने निर्णय गरिएको पशुपति क्षेत्र विकास कोषले जनाएको छ ।
यसका लागि १ सय ४१ किलो सुन लाग्ने अनुमान कोषको छ । भक्तजनको सहभागितामा हुने जलहरी निर्माणमा २४ क्यारेटको सुन प्रयोग गर्ने काेषाकाे याेजना छ ।
भक्तजनसँग सहयोग आह्वान
कोषले जलहरी योजना सार्वजनिक गर्दै सहयोगका लागि भक्तजनहरूलाई आग्रह गरेको छ । तर दातालाई मनमौजी सहयोग गर्ने सुविधा भने छैन । कोषका अनुसार, इच्छुक व्यक्तिले कम्तीमा १ तोलादेखि बढीमा १ किलोग्रामसम्म सुन वा सो बराबरको रकम सहयोग गर्न सक्नेछन् ।
१ किलोग्राम बढीको सुन वा सो बराबरको रकम कसैले सहयोग गर्न चाहेमा त्यो स्वीकार गर्न नसकिने कोषले जनाएको छ । १ तोलाभन्दा कम सुन वा सोबराबरको रकम सहयोग गर्न चाहनेको हकमा के हुन्छ भन्नेबारे भने कोषले केही खुलाएको छैन ।
इच्छुक व्यक्तिले कोषको विभिन्न ५ वटा बैंकमा रहेका खातामार्फत सहयोग गर्न सक्ने व्यवस्था कोषले मिलाएको छ । कोषका अनुसार इच्छुक भक्तजनले कोषको बैंक खाता रहेको कुमारी, एभरेष्ट, कृषि विकास, एसबीआई र नेपाल इन्भेस्टमेन्ट बैंकमार्फत सहयोग गर्न सक्नेछन् ।
सुनको जलहरी निर्माण अभियानका लागि गोप्य दानको व्यवस्था पनि कोषले मिलाएको छ । दानबारे जानकारी दिन अनिच्छा गर्न भक्तजनका लागि कोषले यस्तो व्यवस्था गरेको हो । यसका लागि पशुपतिनाथ मन्दिरको प्रांगणभित्र र बाहिर १/१ वटा दानपात्रको व्यवस्था मिलाएको कोषले जनाएको छ ।
यसरी सहयोग गर्ने दाताको नाम कोषले आफ्नो स्मारिकमा प्रकाशित गर्ने जनाएको छ ।
