२३ फागुन, काठमाडौं । विश्वको सबैभन्दा ठूलो सौन्दर्य प्रतियोगिता मिस वर्ल्ड नेपालमा आयोजना गर्ने चर्चा चल्न थालेको छ । नेपालमा मिस वर्ल्ड आयोजना गर्ने सम्भाव्यता बुझ्न आयोजक संस्थाकी अध्यक्ष जुलिया मोर्ली नेपाल आएकी छन् । उनीसँगै छिन् सन् २०१९ कि मिस वर्ल्ड टोनी एन सिंह ।

मोर्लीको टिमले पर्यटन मन्त्री योगेश भट्टराईसित बिहीबार भेटघाट गरेको थियो । सो भेटघाटमा प्रारम्भिक छलफल भएको मन्त्रालयले जनाएको छ । तीन दिनको तालिकामा आएको मिस वर्ल्डको टोली शुक्रबार हेलम्बु र मकवानपुर पुगेको छ ।

यो पनि पढ्नुहोस श्रृंखलाको प्रोजेक्ट हेर्न मिस वर्ल्डको टोली मकवानपुरको चेपाङ बस्तीमा

हेलम्बुमा मिस नेपाल वर्ल्ड अनुष्का श्रेष्ठको प्रोजेक्ट र मकवानपुरमा पूर्व मिस नेपाल श्रृंखला खतिवडाको प्रोजेक्ट अवलोकनका लागि सो टोली पुगेको हो । यिनै प्रोजेक्टले श्रृंखला र अनुष्कालाई ब्यूटी विथ दि प्रपोजको अवार्ड दिलाएको थियो ।

विश्वकै सबैभन्दा पुरानो र प्रतिष्ठित सौन्दर्य प्रतियोगिताका रुपमा मिस वर्ल्डलाई लिने गरिन्छ । यसको पछिल्लो ६९ औं संस्करण बेलायतमा भएको थियो, जसमा नेपालकी अनुष्काले दुईवटा उपाधि जितेकी थिइन् । यसअघिको संस्करणमा नेपालकी श्रृंखला खतिवडाले निकै चर्चा पाएकी थिइन् र ब्यूटी विथ प्रपोज सहित उनले पनि दुई उपाधि जितेकी थिइन् । ब्यूटी विथ प्रपोजलाई मिस वर्ल्डपछिको सबैभन्दा महत्वपूर्ण टाइटल मानिन्छ ।

नेपालका दुई सुन्दरीहरुले लगातार दुई–दुई उपाधि जितेपछि मिस वर्ल्डका आयोजकको ध्यान नेपालतर्फ तानिएको हो । आगामी मिस वर्ल्ड नेपालमा आयोजना गर्न आयोजकले देखाएको चासोलाई पनि यसैको प्रतिफलका रुपमा बुझ्न सकिन्छ । तर, यो समारोह नेपालमा आयोजना गर्ने कुरा सहज भने छैन ।

स्मरणीय के छ भने मोर्लेले यसअघि ७० औं मिस वर्ल्ड थाइल्यान्डमा हुने भनेर गत वर्ष नै घोषणा गरिसकेकी छन् । यसअघि ६९ औं मिस वर्ल्ड थाइल्यान्डमा गर्ने भनिएको थियो । पछि लन्डन सारियो र ७० औं संस्करण थाइल्यान्डमा गर्ने भनियो । यद्यपि, मिस वर्ल्डको आधिकारिक वेवसाइटमा यसबारे कुनै जानकारी छैन ।

अर्को तथ्य के हो भने मिस वर्ल्डको टोली नेपालमा आउनुको मुख्य उद्देश्य यहाँ आयोजनाको सम्भाव्यता अध्ययन गर्नु होइन । मिस वर्ल्डमा ब्यूटी विथ पर्पस टाइटल जितेका दुई मिस नेपाल श्रृंखला खतिवडा र अनुष्का श्रेष्ठको प्रोजेक्टको अवलोकन र सहयाताको लागि सो टोली आएको मिस वर्ल्डको वेवसाइटमा उल्लेख छ । उनीहरुलाई नेपाल ल्याउने तारतम्य मिस नेपालको आयोजक हिडन ट्रेजरले मिलाएको हो ।

सोही संस्थाको पहलमा मिस वर्ल्डको टोलीसँग पर्यटनमन्त्रीको भेटघाटको मिलाइएको थियो । भेटघाटमा मिस वर्ल्डकी अध्यक्ष मोर्लेले नेपालमा प्रतियोगिता आयोजना गर्ने मौखिक इच्छा व्यक्त गरेकी थिइन् । तर, कुनै ठोस प्रस्ताव पेश गरेकी होइनन् ।

यो पनि पढ्नुहोस मिस वर्ल्ड २०२० नेपालमा गर्नेबारे प्रारम्भिक छलफल

नेपालका तर्फबाट पर्यटन मन्त्री योगेश भट्टराईले पनि प्रतियोगिता आयोजना गर्न नेपालले सक्दो सहयोग गर्ने भनेर मौखिक आश्वासन दिएका हुन्, कुनै ठोस प्रस्ताव गरेका छैनन् । त्यसैले यो विषय अहिलेसम्म एकदमै काँचो छ ।

मिस वर्ल्डको ७० औं संस्करण यदि नेपालमा गर्ने हो भने चाँडोभन्दा चाँडो सरकारले आयोजकसँग सहमतिमा पुग्नु जरुरी हुन्छ । यसपाली नभ्याए सन् २०२१ को मिस वर्ल्ड नेपालमा आयोजना गर्ने गरी छलफल अगाडि बढाउन सकिन्छ ।

तर, सरकारलाई गत वर्ष आइफा अवार्ड आयोजना गर्न खोज्दाको नमिठो अनुभवले झस्काइरहेको छ । अगुल्टाले हानेको कुकुर विजुली चम्किँदा तर्सिन्छ भनेजस्तो आइफामा ठूलो आलोचना खेपेकाले सरकार मिस वर्ल्ड आयोजनामा अघि बढ्न हिच्किचाइरहेको छ । जब कि यी दुई प्रतियोगितामा आकाश–जमीन अन्तर छ ।

मिस वर्ल्ड भनेको एउटा विश्वव्यापी प्रतियोगिता हो भने आइफा बलिउडको फिल्मी अवार्ड । मिस वर्ल्डमा विश्वभरका सुन्दरीहरुले भाग लिने भएकाले यो प्रतियोगिताको चर्चा पनि विश्वव्यापी हुन्छ ।

के के छन् चुनौति ?

मिस वर्ल्डमा संसारभरका एक सयभन्दा बढी देशहरुको सहभागिता रहन्छ । अघिल्लो सस्करणमा १ सय ११ देशले भाग लिएका थिए । त्यसैले यो एउटा विशाल समारोह हो । यसलाई ‘सौन्दर्यको विश्वकप’ भन्दा पनि हुन्छ ।

प्रतियोगिताको फाइनल राउन्ड भन्दा अगाडिदेखि विभिन्न कार्यक्रम हुन्छ जसबाट अन्तिम चरणमा पुग्ने प्रतियोगीको छनोट गरिन्छ । त्यसैले करिब एक महिनासम्म विश्वभर आएको प्रतिनिधिमण्डललाई आयोजक देशले आतिथ्य दिनुपर्ने हुन्छ । यसका लागि उचित लजिस्टिक तथा सुरक्षा प्रबन्ध मिलाउनु आयोजकको जिम्मेवारी हो ।

सबैभन्दा पहिले त यति ठूलो प्रतियोगिता आयोजना गर्नका लागि ‘भेन्यु’ को अभाव छ । लन्डनमा १ लाख वर्गकिलोमिटर क्षेत्रफलमा फैलिएको भेन्यूमा प्रतियोगिता आयोजना भएको थियो । नेपालमा यस्तो भेन्यू नभएकाले अस्थायी संरचना बनाउनुपर्ने हुन्छ, जसका लागि समय र खर्च पर्याप्त लाग्छ ।

सहभागी सुन्दरीहरुलाई एक महिनासम्म नेपालमा राख्दा एउटै भवनभित्र कोचेर राख्ने पनि होइन । उनीहरुलाई विभिन्न स्थानमा पुर्‍याउनुपर्ने हुन्छ । उनीहरुलाई नेपालका प्रमुख पर्यटकीय गन्तव्यहरुमा पुर्‍याउन सके मात्र नेपालको पर्यटन प्रवद्र्धनमा टेवा पुग्ने बताउँछिन् पूर्व मिस नेपाल मलिना जोशी ।

‘जहाँ पनि मिस वर्ल्ड आयोजना हुँदा सहभागीहरुलाई ती देशका राम्रा कुराहरुको अवलोकन गराइन्छ । हामीले पनि आफ्नो देशमा भएका राम्रा चिजहरु देखाउनैपर्छ । त्यसका लागि राम्रो सडक र यातायातको सुविधा आवश्यक छ,’ उनले भनिन् ।

‘मिस वर्ल्ड आयोजना गर्नु धेरै राम्रो अवसर हो । तर नेपालका लागि निकै चुनौतिपूर्ण पनि छ । हामीसँग त अहिले विदेशी पर्यटकहरुलाई लागि न्यूनतम पूर्वाधारहरु पनि छैनन् । शौचालयकै अभाव छ । यति धेरै संख्यामा विदेशबाट भीआईपीहरु ल्याउने हो भने यस्तो विजोक तरिकाले त पक्कै हुँदैन ।’

यदि नेपालमा मिस वर्ल्ड आयोजना हुने भयो भने त्यो निकै खुशीको कुरा हुने उनी बताउँछिन् । त्यसले नेपाललाई विश्वसामु चिनाउन मद्दत गर्ने र पर्यटन क्षेत्र फस्टाउने उनको तर्क छ ।

मिस वर्ल्ड आफैंमा अत्यन्त महंगो समारोह हो । नेपालमा आयोजना गर्ने हो भने नेपालको सरकारले पनि यसको कुन–कुन खर्च व्यहोर्ने भन्ने कुरा आउँछ । यसका लागि आयोजकसँग नेगोसियसन गर्दा सावधानी अपनाउनुपर्ने हुन्छ । यो कार्यक्रमबाट नेपालले भविश्यमा कति लाभ लिन सक्छ भन्ने आँकलन गरेर त्यसको अनुपातमा सरकारले आफ्नो मुठ्ठी खोल्ने हो ।

सरकारले यो कार्यक्रम आयोजना गर्न चासो दिनुको मुख्य उद्देश्य पर्यटन प्रवद्र्धन नै हो । अहिले भिजिट नेपाल २०२० चलिरहेको छ । तर, कोरोना आतंकले गर्दा पर्यटन क्षेत्र धराशयी अवस्थामा छ । यसलाई पुनः जगाउने हो भने नेपाललाई विश्वकै ध्यान आकृष्ट हुने यस्तै ग्रान्ड कार्यक्रमको आवश्यकता छ ।