१५ वैशाख काठमाडौं । अन्तर्राष्ट्रिय ओलम्पिक कमिटी आइओसीले एक वर्ष पछि सरेको टोकियो ओलम्पिकको लागि खेलाडीको तयारी खर्च र सहभागिमा रकममा वृद्धि गरेको छ । यसै वर्ष जुलाई अगष्टमा हुने तय भएको ओलम्पिक एक वर्षपछि अर्थात २०२१ मा सरेको छ ।
त्यसैले आईओसीले खेलाडीको खर्चमा आईओसीले २५.३ मिलियन डलर वृद्धि गर्ने निर्णय गरेको हो । आईओसीले विज्ञप्ति सार्वजनिक गर्दै प्रतियोगिता सरेपछि तयारी खर्च पनि बढेको भन्दै खेलाडीको तयारी र सहभागिता खर्चका राष्ट्रिय ओलम्पिक कमिटीलाई २५ मिलियन भन्दा बढी डलर थप गरेको हो ।
यस निर्णयले राष्ट्रिय ओलम्पिक कमिटीहरुलाई अतिरिक्त रुपमा लाग्ने खर्चमा सहयोग पुग्ने आइओसीले जनाएको छ ।
आईओसीले ओलम्पिक सोलिडारीटी बजेट १५ मिलियन बढाएको हो । जसले १८५ देशका १६ सय खेलाडीको तयारीमा सहयोग पुग्ने आइओसीले जनाएको छ । यस्तै १०.३ मिलियन डलर भने ओलम्पिक सरेकोले राष्ट्रिय ओलम्पिक कमिटीको खर्चका लागि छुट्टयाइएको हो ।
टोकियो ओलम्पिक २०२० जुलाई २५ देखि अगष्ट ९ सम्म आयोजना गर्ने तय भए पनि कोरोना भाइरसको संक्रमणका कारण एक वर्षपछि अर्थात २०२१ जुलाई २३ देखि अगष्ट ८ सम्म हुने गरी सरेको हो ।
