५ जेठ, काठमाडौं । वायर्न म्युनिखले जर्मन बुण्डेसलिगामा फेरि ४ अंकको अग्रता बनाएको छ । लिगअन्तर्गत आइतबार भएको खेलमा लिग लिडर वायर्नले युनियन बर्लिनलाई २-० ले पराजित गरेको हो ।
बर्लिनको मैदानमा भएको खेलमा वायर्नका लागि रोवर्ट लेवान्डोस्कीले ४०औं मिनेटमा पेनाल्टीमार्फत पहिलो गोल गरे । यस्तै, ८०औं मिनेटमा बेन्जामिन पाभार्डले गोल गर्दै जित पक्का गरेका थिए ।
वायर्नका लागि थोमस मुलरले भने पेनाल्टी अवसर चुकाएका थिए । जितपछि २६ खेलबाट ५८ अंक जोडेको वायर्नले दोस्रो स्थानको बवरुसिया डरटमण्डलाई ४ अंकले पछि पारेको छ । समान खेलबाट डर्टमण्डको ५४ अंक छ ।
आइतबारै भएको अर्को खेलमा एफसी कोल्न र मेइन्जले २-२ को बराबरी खेल्दै अंक बाँडेका छन्।
विश्वभर कोरोना भाइरस महामारी कायम रहेपनि सुरक्षाको उपायहरू अपनाउँदै शनिबारदेखि क्लोज डोरमा जर्मनीको शीर्ष डिभिजनको फुटबल फेरि सुरु भएको हो ।
लिगअन्तर्गत आज वेडर ब्रेमन र वायर लेभरकुजनबीच खेल हुनेछ ।
