१५ जेठ, काठमाडौं । वीरगञ्जस्थित गण्डक कोभिड अस्पतालबाट चार जना कोरोना संक्रमित निको भएर डिस्चार्ज भएका छन् ।
उनीहरुको पछिल्लो दुई वटा पीसीआर परीक्षण रिपोर्ट नेगेटिभ आएपछि उनीहरुलाई डिस्चार्ज गरिएको कोभिड अस्पतालका कोअर्डिनेटर डा. उदयनारायण सिंहले जानकारी दिए ।
डिस्चार्ज हुने सबै जना वीरगञ्ज महानगरपालिका–३ का हुन् । जसमा ३२ र ३८ वर्षीया महिला छन् भने २७ र २८ वर्षीय पुरुष रहेका छन् ।
गण्डक कोभिड अस्पतालबाट बुधबार राति चार जना डिस्चार्ज भएसँगै अब ५ जना संक्रमित अस्पतालमा उपचाररत रहेको उनले बताए ।
यसअघि मंगलबार राति गण्डक कोभिड अस्पतालबाट एकै पटक २१ जना डिस्चार्ज भएका थिए ।