२८ जेठ, काठमाडौं । नेपाली कांग्रेसले क्वारेन्टिनमा बसेका सबै नागरिकको पीसीआर विधिबाट कोरोना संक्रमण परीक्षण गरेरमात्र घर पठाउन सरकारलाई आग्रह गरेको छ । वरिष्ठ नेता रामचन्द्र पौडेलले बुधबार प्रधानमन्त्री केपी शर्मा ओलीलाई भेटी पीसीआर प्रविधिको परीक्षण नगरी क्वारेन्टिनस्थलबाट घर नपठाउन आग्रह गरेका हुन् ।
केही दिनअघि स्वास्थ्य तथा जनसंख्या मन्त्रालयले प्रदेश र स्थानीय तहमा पत्राचार गरी क्वारेन्टिनमा १४ दिन बसेपछि पीसीआर परीक्षण नगरी घर पठाउन निर्देशन दिएको थियो । कांग्रेसले मृत्यु भएका व्यक्तिको अनिवार्य कोरोना परीक्षण गर्न र आइसोलेसनमा रहेकाको पनि परीक्षण गरेर मात्र डिस्चार्ज गर्न सरकारलाई आग्रह गरेको छ ।
कांग्रेसले क्वारेन्टिनहरु मापदण्डअनुसार उचित व्यवस्थापन गर्न, पिउने पानी, खाना, शौचालय र दूरीसहित बस्ने व्यवस्था मिलाउन पनि आग्रह गरेको छ । त्यस्तै क्वारेन्टिनमा उमेर र स्वास्थ्य अवस्थाको अभिलेख तथा नियमित स्वास्थ्य निगरानी, आवश्यक औषधी, एम्बुलेन्स, परिक्षण तथा नियमित परामर्शको व्यवस्था गर्न पनि कांग्रेसले माग गरेको छ ।
‘क्वारेन्टिन सञ्चालन गर्न स्थानीय सरकारलाई आवश्यक आर्थिक र प्राविधिक स्रोत तत्काल उपलब्ध गरियोस् । सरकारले राजनीतिक आस्था र आग्रहका आधारमा स्थानीय तहलाई हेरिरहेको छ । यस्ता कार्य तत्काल बन्द गरियोस्’ प्रधानमन्त्रीलाई बुझाएको पत्रमा भनिएको छ ।
कांग्रेसले कोरोना संक्रमितको उपचार गर्ने डेडिकेटेड अस्पताललाई आवश्यक उपकरण, सामग्री, औषधी, स्वास्थ्यकर्मीको सुरक्षा सामग्री, आइसोलेसन बेड र जनशक्तिको व्यवस्था गर्न पनि माग गरेको छ । अन्य रोगका बिरामीले पनि विना अवरोध सेवा पाउने सुनिश्चितता गर्न पनि कांग्रेसको माग छ । ‘लकडाउनको अवधिमा सयकडौं मानिसहरुले आत्महत्या गरेका छन् । यसले नागरिकको राज्यका प्रति चरम निराशा देखाउँछ । यस्ता समस्याको समाधानका लागि सरकारले आवश्यक कार्य गरोस्’ काग्रेसको पत्रमा भनिएको छ ।
कांग्रेसले राष्ट्र विपतमा रहेको बेला स्वास्थ्य सामग्री खरीद जस्तो विषयमा निरन्तर भ्रष्टाचार कमिसन लेनदेन भएको भन्दै यसलाई निर्लज्जताको पराकाष्टा भनेका छन् । ‘सरकार कोभिड १९ नियन्त्रण गर्ने कार्यका लागि १० अर्ब खर्च भएको भनिरहेको छ । त्यो खर्चको सम्पूर्ण विवरण सार्वजनिक गरियोस् । हालसालै पनि स्वास्थ्य सामग्री खरिदमा अनियमितता भएको विषय सार्वजनिक भएको छ । यी सबै भ्रष्टाचार, अनियमितता बारे छानबिन गरी तत्काल सार्वजनिक रुपमा जानकारी गरियोस्’ पत्रमा भनिएको छ ।
त्यस्तै राहत दिनुपर्ने श्रमिक, बेरोजगार, विद्यार्थी, अपांगता भएका नागरिक र एकल महिलालगायतलाई न्यायोचित ढंगले राहत वितरण गरिने व्यवस्था गर्न पनि माग गरेको छ ।
देशभित्र र बाहिर लाखौं नेपालीहरुले रोजगारी गुमाएको वर्तमान अवस्थामा देशमा व्यापक रोजगारीको सिर्जना गर्न संसद कोष, प्रधानमन्त्री स्वरोजगार कार्यक्रम, राष्ट्रपति शिक्षा जस्ता कार्यक्रम हटाएर पालिकास्तरमा उत्पादनमुखी रोजगारीको व्यवस्था गर्न पनि कांग्रेसले माग गरेको छ ।
कोरोना महामारी रोकथामका लागि अपनाइएका उपायका कारण अहिले साना, ठूलो उद्योग, व्यापार, व्यवसाय ठप्प हुँदा औपचारिक र अनौपचारिक क्षेत्रमा कार्यरत श्रमिकहरु तथा सानोतिनो स्वःव्यवसाय गरी जिविकोपार्जन गर्ने उद्यमी र श्रमजीवीहरु ठूलो आर्थिक संकटमा परेको कांग्रेसले बताएको छ ।
‘यस अवस्थामा साना, ठूलो उद्योग, व्यापार, व्यवसायको संरक्षण र तमाम श्रमिक मजदूर उद्यमीहरुको सहयोगलाई उच्च प्राथमिकतामा राखी ठोस राहत प्याकेज घोषणा गरियोस्’ वरिष्ठ नेता पौडेलले प्रधानमन्त्रीलाई बुझाएको पत्रमा भनिएको छ ।
ज्ञापनपत्र बुझाउन वरिष्ठ नेता पाैडेलकाे नेतृत्वमा नेताहरू गाेपालमान श्रेष्ठ, डा.प्रकाशशरण महत, बालकृष्ण खाँड र रमेश लेखक प्रधानमन्त्री निवास बालुवाटार पुगेका थिए ।
ज्ञापनपत्र बुझ्दै प्रधानमन्त्री केपी शर्मा ओलदीले ज्ञापनपत्रमा उल्लेखित सुझावलाई सकारात्मक र गम्भीरतापूर्वक लिएर आश्यकताअनुसार कार्यान्वयन गर्ने जानकारी गराएका प्रधानमन्त्रीका प्रेस सल्लाहकार सूर्य थापाले जानकारी दिए ।
