१७ असोज, कैलाली । कैलाली गौरिगंगाका नगरप्रमुख भीमबहादुर देउवालाई कोरोना संक्रमण पुष्टि भएको छ ।
शुक्रबार उनीमा संक्रमण पुष्टि भएको स्वास्थ्य शाखा प्रमुख दीर्घराज जोशीले जानकारी दिए ।
केही समयअघि नगरपालिकाका एक कर्मचारीमासमेत कोरोना संक्रमण पुष्टि भएको थियो । उनको कन्ट्र्याक ट्रेसिङमा परेका मेयर देउवासहित अन्य १३ कर्मचारीमा समेत कोरोना पुष्टि भएको जोशीले बताए ।
‘मेयरसहित १३ कर्मचारीमा अहिले पनि कुनै लक्षण छैन,’ उनले भने ‘उहाँहरू सबै अहिले होम आइसोलेसनमा हुनुहुन्छ ।’
७ थुनुवासहित ११ प्रहरीमा कोरोना
यसैगरी जिल्ला प्रहरी कार्यालय कैलालीमा ७ थुनुवासहित ११ प्रहरीमा कोरोना संक्रमण पुष्टि भएको छ । शुक्रबार विभिन्न मुद्दामा अनुसन्धानका लागि पक्राउ परेका ७ थुनुवामा कोरोना पुष्टि भएको हो ।
जिल्ला प्रहरी कार्यालयका प्रवक्ता प्रहरी नायब उपरीक्षक प्रतीक विष्टले उनीहरूलाई अहिले छुट्टै राखिएको बताए । थुनुवा कक्षमा करिब ८० जना छन् ।
प्रवक्ता विष्टले ११ जना प्रहरीमा पनि संक्रमण देखिएको बताए ।
