२२ माघ, काठमाडौं । विवेकशील साझा पार्टीले संसदीय सुनुवाइविना नै संवैधानिक आयोगहरूमा पदाधिकारीहरूको नियुक्ति र शपथ ग्रहण गराएकोप्रति गम्भीर आपत्ति जनाएको छ ।

पार्टीका प्रवक्ता शरदराज पाठकले बिहीबार विज्ञप्ति जारी गर्दै सरकारले संसद् विघटन गरी मुलुकलाई ठूलो अस्थिरतातर्फ धकेलेको र सर्वोच्च अदालतमा मुद्दा विचाराधीन रहेको अवस्थामा गरेको उक्त नियुक्ति संविधानमाथिको फेरि घातक प्रहार रहेको बताए ।

सरकारको असंवैधानिक कदमको राष्ट्रपतिले समेत सहजै सदर गरिनु झनै दुर्भाग्यपूर्ण रहेको ठहर गर्दै प्रधानमन्त्री ओलीको तानाशाही प्रवृत्तिको समर्थन गर्नु आफू र आफ्ना सन्ततिको भविष्यमाथि आफै बन्चरो प्रहार गर्नु सरह रहेको जनाएको छ ।

‘श्रृंखलाबद्ध रूपमा असंवैधानिक कदमहरू चाल्दै यो सरकार मुलुकलाई गम्भीर द्वन्द्वतर्फ धकेल्न उद्धत रहेको छर्लङ्ग भएको छ।’ विज्ञप्तिमा भनिएको छ ‘ नियुक्ति असंवैधानिक रहेको जिकिरसहित सर्वोच्च अदालतमा दायर मुद्दा विचाराधीन रहेकै अवस्थामा आफै उपस्थित भई शपथ ग्रहण गराउने कार्यले प्रधानन्यायाधीशमाथि पनि नैतिक प्रश्न खडा भएको छ ।’

विवेकशील साझाले नेकपाको प्रचण्ड-माधव समूहले बिहीबारका लागि आह्वान गरेको आम हड्तालको पनि विरोध गरेको छ । पार्टीले सरकारको प्रतिकार गर्ने नाममा नागरिकलाई दुःख दिने र अर्थतन्त्रमा आघात पुग्ने बन्द, आमहडताल जस्ता कार्य नगर्न सबै पक्षलाई आग्रह गरेको छ ।