२३ माघ, जनकपुरधाम । प्रदेश २ का मुख्यमन्त्री लालबाबु राउतले पछि पारिएका समुदायको उन्नति र विकासका लागि धेरै योजनाहरु ल्याएको भन्दै यसको अनुभूति केही वर्षपछि हुने बताएका छन् ।
सरकारले प्रदेशको समृद्धि र विकासका लागि ती योजनाहरु ल्याएको बताउँदै मुख्यमन्त्री राउतले अहिलेको योजनाको प्रतिफल केही वर्षमा पाउने बताए ।
समता फाउण्डेशनले शुक्रबार जनकपुरधाममा आयोजना गरेको समाजिक न्यायका लागि सबलीकरण कार्यक्रमलाई सम्बोधन गर्दै मुख्यमन्त्री राउतले जातीय विभेद अन्त्य नभएसम्म विकास र समृद्धि असम्भव भएको बताए ।
संविधानले सुनिश्चित गरेकै कारण जनप्रतिनिधिमा दलितहरुको सहभागिताको परिकल्पना गर्न सकिएको भन्दै उनले आफूहरु हरेक ऐन कानुनमा दलित, महिला, मुस्लिम लगायतका समुदायको पहुँचलाई सुनिश्चित गर्दै गएको उल्लेख गरे ।
कार्यक्रममा प्रदेश सभा सदस्य चमेली देवी दास, दलित अगुवा भोला पासवान लगायतले सामाजिक न्यायका बिषयमा बोलेका थिए ।
