Comments Add Comment

बजेट खर्च र राजस्व संकलन दुवै बढ्यो, १८४ अर्ब आम्दानी हुँदा ८९ अर्ब खर्च

१ असोज, काठमाडौं । चालु आर्थिक वर्ष २०७८/७९ को पहिलो दुई महिना (साउन–भदौ)मा बजेट खर्च र आम्दानी दुवैमा वृद्धि भएको छ । महालेखा नियन्त्रक कार्यालयका अनुसार दुई महिनाको अवधिमा राजस्व संकलन, अनुदान प्राप्ति र विविध स्रोतबाट सरकारले १ खर्ब ८४ अर्ब ७४ करोड ४५ लाख रुपैयाँ संकलन गर्न सफल भएको छ ।

यस अवधिमा सरकारको खर्च भने ८९ अर्ब ९३ करोड ५८ लाख रुपैयाँ भएको छ । गत आर्थिक वर्ष २०७७/७८ को तुलनामा यो वर्ष राजस्व संकलन र खर्च दुवैमा वृद्धि भएको देखिएको छ । गत वर्ष कोरोना महामारी कायम थियो ।

आर्थिक गतिविधि आंशिक रुपमा मात्र सञ्चालन भएको दुई महिनाको अवधिमा मात्र १०५ अर्ब रुपैयाँ राजस्व संलकन भएको थियो । चालु आवमा भने पहिलो दुई महिना सरकारले लक्ष्यको हाराहारीमै राजस्व संकलन गर्न सकेको छ ।

राजस्व संकलन करिब १५ प्रतिशत

दुई महिनाको अवधिमा सरकारले राजस्व संकलन लक्ष्यको करिब १५ प्रतिशत संकलन गरिसकेको छ । तथ्यांक अनुसार चालु आर्थिक वर्षमा सरकारको राजस्व संकलनको लक्ष्य ११ खर्ब ५१ अर्ब ६० करोड हो । यसमध्ये भदौ मसान्तसम्म १ खर्ब ६८ अर्ब ५७ करोड रुपैयाँ राजस्व संकलन भएको छ । यसमध्ये कर राजस्व १ खर्ब ४८ अर्ब ५६ करोड र गैर कर राजस्व २० अर्ब रुपैयाँ संकलन भएको छ ।

दुई महिनामा अनुदान प्राप्त भइसकेको छैन । विविधि प्राप्तिमा १६ अर्ब १६ करोड रुपैयाँ संकलन भएको छ । यसरी सरकारले दुई महिनामा १ खर्ब ८४ अर्ब ७४ करोड ४५ लाख रुपैयाँ आम्दानी गरेको हो ।

वित्तीय व्यवस्थातर्फ ठूलो प्रगति, पूँजीगत खर्च नगन्य

खर्चतर्फ पहिलो दुई महिनाको अवधिमा वित्तीय व्यवस्थातर्फ ठूलो खर्च भएको छ । तथ्यांक अनुसार दुई महिनाको अवधिमा २८ अर्ब ७३ करोड २३ लाख रुपैयाँ बजेट वित्तीय व्यवस्थामा भएको छ । यो वर्ष सरकारले वित्तीय व्यवस्थामा २ खर्ब ७ अर्ब रुपैयाँ बजेट खर्चको लक्ष्य राखेको छ । दुई महिनामा भएको खर्च १३.८२ प्रतिशत हो । यो अवधिमा कुल बजेट खर्च ८९ अर्ब ९३ करोड ५८ लाख रुपैयाँ भएको छ । यसमध्ये चालुतर्फ ५८ अर्ब ५९ करोड ४८ लाख रुपैयाँ खर्च भएको छ । यो वर्ष सरकारले कुल १६ खर्ब ४७ अर्ब ५७ करोड रुपैयाँ खर्चको लक्ष्य राखेको छ ।

यसमध्ये चालुतर्फ १० खर्ब रुपैयाँ खर्च गर्ने लक्ष्य छ । पूँजीगत खर्च सधैंझैं यो वर्ष पनि सुस्त शुरुवात भएको छ । दुई महिनामा मात्र २ अर्ब ६० करोड रुपैयाँ पूँजीगत खर्च भएको छ । यो लक्ष्यको ०.६ प्रतिशत हो । यो वर्ष सरकारले ४ खर्ब ३५ अर्ब २४ करोड रुपैयाँ पूँजीगत खर्चको लक्ष्य राखेको छ । यो सबै लक्ष्यको आँकडा अध्यादेशबाट आएको बजेटको हो । यो आँकडालाई वर्तमान सरकारले प्रतिस्थापन विधेयकमार्फत केही चलाएको छ । उक्त बजेट भने अझै पास भइसकेको छैन ।

यस्तो छ दुई महिना (साउनभदौ)को सरकारको आम्दानी र खर्च

क्र. सं. शीर्षक आर्थिक वर्ष २०७७/७८ आर्थिक वर्ष २०७८/७९
१. आम्दानी (राजस्व, अनुदान र विविध) १ खर्ब ५ अर्ब ३८ करोड (१०.४२ प्रतिशत) १ खर्ब ६८ अर्ब ५७ करोड ६७ लाख (१४.६४ प्रतिशत)
२. चालु खर्च ६३ अर्ब २४ करोड ३३ लाख ५८ अर्ब ५९ करोड ४८ लाख (५.८३ प्रतिशत)
३. पूँजीगत खर्च ३ अर्ब ७५ करोड २७ लाख २ अर्ब ६० करोड ८७ लाख (०.६ प्रतिशत)
४. वित्तीय व्यवस्था १ अर्ब ५७ करोड २८ लाख २८ अर्ब ७३ करोड २३ लाख (१३.८२ प्रतिशत)
५. कुल बजेट खर्च ६८ अर्ब ५६ करोड (१०.८७ प्रतिशत) ८९ अर्ब ९३ करोड ५८ लाख (५.४६ प्रतिशत)

स्रोत : महालेखा नियन्त्रक कार्यालय

यो खबर पढेर तपाईलाई कस्तो महसुस भयो ?

Advertisment