+
+

सुस्तायो कोरोना खोप अभियान

प्रेम लामा प्रेम लामा
२०७८ कात्तिक २३ गते १९:३७
फाइल तस्वीर

२३ कात्तिक, काठमाडौं । कोरोना भाइरस (कोभिड–१९) को संक्रमण कम भएको बेला खोप अभियान पनि सुस्ताएको छ । कुनै बेला एकैदिन पौने तीन लाख डोज खोप लगाउने गरिएकोमा अहिले हजारमा सीमित भएको छ ।

स्वास्थ्य तथा जनसंख्या मन्त्रालयको तथ्यांकअनुसार कात्तिक महिनाभर खोप अभियान सुस्त देखिएको छ । कात्तिक १ गतेका दिन २७ हजार ७०१ जनालाई खोप लगाइएको थियो । तर कात्तिक २२ गते अर्थात सोमबार १,९१७ जनालाई मात्रै भेरोसेल खोपको दोस्रो डोज लगाइएको छ ।

जबकी सरकारले असोज १३ गते एकैदिन २ लाख ८६ हजार १४५ जनालाई खोप लगाएकोमा कात्तिक १३ गते भने १ लाख ७३ हजार ५९ जनालाई खोप लगाइएको छ । यो संख्या कात्तिक महिनामा प्रयोग भएको सबैभन्दा बढी खोप हो ।

तर त्यसयता खोप लगाउने मानिसको संख्या क्रमशः घट्दै गएको तथ्यांकमा उल्लेख छ ।

यस्तो छ दैनिक खोप लगाउनेको संख्या :

मिति खोप लगाउनेको संख्या
१ कात्तिक २७,७०१
२ कात्तिक १,६३,०२६
३ कात्तिक ९,८०२
४ कात्तिक २३,५६८
५ कात्तिक ५८,८५३
६ कात्तिक ६३,०७४
७ कात्तिक ७,५७६
८ कात्तिक ५७,६१०
९ कात्तिक ७३,४२७
१० कात्तिक ७७,२०७
११ कात्तिक १,०१,४७५
१२ कात्तिक १,२५,५२७
१३ कात्तिक १,७३,०५९
१४ कात्तिक ३८,८१५
१५ कात्तिक ६५,०२८
१६ कात्तिक ८०,८१८
१७ कात्तिक ९७,०७०
१८ कात्तिक ६४,३७२
१९ कात्तिक ३,७७५
२० कात्तिक १,९८५
२१ कात्तिक
२२ कात्तिक १,९१७

के भन्छन् स्वास्थ्य अधिकारीहरु ?

स्वास्थ्य सेवा विभागको परिवार कल्याण महाशाखाका प्रमुख डा. विवेक लालका अनुसार खोप पर्याप्त छैन, त्यसैले खोप लगाउने संख्या घट्नुलाई स्वभाविक ठान्छन् ।

‘खोप भण्डारण कक्षमा हामीसँग अहिले पर्याप्त मात्रामा खोप छैन’ उनले भने, ‘समय समयमा प्राप्त हुने खोप अभियानकै क्रममा सबै प्रदेशमा सञ्चालन गरिरहेका छौं । अभियान सञ्चालन हुने बेला खोप लगाउने संख्या बढ्नु स्वभाविक हो । तर अभियान नचल्दा भने खोप लगाउने संख्या घट्छ ।’

उनका अनुसार एकै पटक ४० लाख डोज खोप आएको बेला दुई चरणमा खोप अभियान सञ्चालन गरिएको थियो । त्यसबेला एकै दिन २ लाख भन्दा बढीलाई खोप लगाएको रेकर्ड छ । पछिल्लो समय खोपको आयात कम भएको छ ।

केन्द्रीय खोप भण्डारणमा कति छन् खोप ?

कात्तिक १७ गतेसम्म टेकुस्थित केन्द्रीय खोप भण्डारणमा २१ लाख ४० हजार ६०३ डोज खोप स्टक छन् । जसमध्ये १६ लाख डोज भेरोसेल खोप कात्तिक १७ गते मात्रै प्राप्त भएको थियो । यो चीन सरकारले अनुदानमा दिएको हो ।

यसबाहेक विभिन्न समयमा प्राप्त २ लाख ५९ हजार ७८६ डोज भेरोसेल, १ लाख ५७२ फाइजर, ४६ हजार ६०० एस्ट्राजेनेका, १ लाख १३ हजार ६१० कोभिशिल्ड र ३५ डोज जोनसन एण्ड जोनसन खोप स्टक छन् ।

यस्तै प्रदेशस्तरका खोप भण्डारण केन्द्रमा १३ लाख ३० हजार ६८१ डोज खोप स्टकमा रहेको मन्त्रालयको तथ्यांकमा उल्लेख छ । दोस्रो डोज खोप सुनिश्चित गरेर मात्रै पठाउने गरिएकाले भण्डारण केन्द्रमा खोप मौज्दात देखिएको डा. लाल बताउँछन् ।

कतिले लगाए पूर्ण खोप ?

स्वास्थ्य मन्त्रालयको तथ्यांक अनुसार कात्तिक २२ गतेसम्म ७४ लाख ३६ हजार ७१४ जनाले कोरोनाविरुद्धको पूर्ण खोप पाएका छन् । यो कुल जनसंख्याको झण्डै २५ प्रतिशत हो ।
जसमध्ये कोभिशिल्ड र भेरोसेलको पूर्ण मात्रा लगाउने संख्या ५८ लाख ९३ हजार २१७ छन् भने जोनसन एण्ड जोसन खोप लगाउने संख्या १५ लाख ४३ हजार ४९७ जना छन् ।

दोस्रो डोजको पर्खाइमा २८ लाख ४३ हजार ३१५ जना रहेको मन्त्रालयको तथ्यांकमा उल्लेख छ ।

चैतमसान्तभित्र सबै नागरिकले पाउलान् खोप ?

सरकारले चैतमसान्तभित्र योग्य सबै नागरिकलाई खोप लगाउने लक्ष्य राखेको छ । तर कात्तिक महिनाको उत्तरार्धमा खोप लगाउन योग्य (१८ वर्षभन्दामाथि) करिब ३७.३ प्रतिशत जनसंख्याले मात्रै पूर्ण खोप पाएका छन् ।

लक्ष्य भेट्याउन सरकारले तीव्र गतिमा खोप कार्यक्रम सञ्चालन गर्नुपर्ने जनस्वास्थ्य विद्हरु बताउँछन् ।

तर स्वास्थ्य अधिकारीहरु भने चैतमसान्तभित्र १८ वर्षमाथिका सबै नागरिकले खोप पाउने दावी गर्छन् । डा. लाल भन्छन्, ‘सरकारले राखेको लक्ष्य अनुसार नै खोप ल्याउने प्रक्रिया अघि बढिसकेको छ । खोपका लागि सरकारले खोप उत्पादक कम्पनीहरुलाई एडभान्स दिइसकेको छ । अहिलेसम्म प्राप्त संकेत अनुसार सबै नागरिकले चैतमसान्तभित्रमा खोप पाउँछन् ।’

सरकारी तथ्यांकअनुुसार हालसम्म नेपालमा २ करोड २० लाखभन्दा बढी खोप नेपाल भित्रिएको छ ।

कात्तिक २२ गतेसम्म २ करोड २० लाख ८० हजार ९३० डोज खोप प्राप्त भएको छ, जसमध्ये सरकारले १ करोड ३० लाख २० हजार डोज खोप खरिद गरेको छ भने ९० लाख ६० हजार ९३० डोज खोप अनुदानमार्फत प्राप्त भएको छ ।

लेखकको बारेमा
प्रेम लामा

यो खबर पढेर तपाईलाई कस्तो महसुस भयो ?

Khusi
                                chhu

खुसी

Dukhi
                                chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment