+
+

माओवादीको प्रदेश उपाध्यक्ष निर्वाचित रुपाले भनिन् : टीके प्रथा तोड्यौं

अनलाइनखबर अनलाइनखबर
२०७८ पुष ६ गते २०:३८

६ पुस, काठमाडौं । नेकपा माओवादी केन्द्रको बागमती प्रदेश उपाध्यक्षमा निर्वाचित रुपा महर्जनले आफूहरूले पार्टी नेतृत्व चयनमा टीके प्रथा तोडेको बताएकी छन् ।

सोमबार राति सम्पन्न निर्वाचनमा लोकप्रिय मत ल्याएर उपाध्यक्षमा निर्वाचित महर्जनले नेतृत्व चयन गर्दा आन्तरिक निर्वाचन पनि आवश्यक छ भन्ने पुष्टि गर्न सकेको बताइन् ।

‘टीका लगाउने प्रथाबाट हामी अगाडि बढ्यौं भने समस्या कहिल्यै हल हुन सक्दैन । नेताहरूले आफ्नो खल्तीबाट मान्छे ल्याउने र अगाडि सार्ने भएपछि सधैंभर पार्टी पेण्डुलममा बस्ने, बन्धक बन्ने अवस्था थियो । त्यसलाई क्रस गर्नकै लागि भए पनि निर्वाचन जरुरी छ भन्ने पुष्टि भयो’ उनले अनलाइनखबरसँग भनिन् ।

माओवादी केन्द्रको बागमती प्रदेश अधिवेशनबाट प्रदेश समितिका सदस्यहरु चयन भए पनि पदाधिकारी चयनमा सहमति नजुटेपछि सोमबार राति निर्वाचन गरिएको थियो । महर्जनले लोकप्रिय मतसहित उपाध्यक्षमा निर्वाचित भएकी हुन् । निर्वाचनमा २७५ मतदातामध्ये २६१ मत खसेको थियो । महर्जन १७८ मत ल्याएर निर्वाचित भएकी हुन् ।

उनी भन्छिन्, ‘स्वतन्त्र रुपमा कार्यकर्ताले पनि सक्षम नेतृत्व चुन्दा रहेछन् भन्ने यो उदाहरण हो । यो एउटा परिणाम हो ।’

चुनाव नभएको भए आफू उपाध्यक्ष हुनेमा उनी ढुक्क थिइनन् । महर्जनले थपिन्, ‘मेरै सवालमा मैलै कहीँ कतै लबिङ गरेको थिइन । तर, आखिरमा मतदाताले सबैको मुल्याङ्कन गर्ने रहेछन् । त्यसको उचित परिणाम आयो ।’

अब पार्टीभित्र निर्वाचन विधि कसरी अघि बढाउने भन्ने विषयमा छलफल गरिनुपर्ने उनी बताउँछिन् । सबैको समान सहभागिताका लागि प्रत्यक्ष र समानुपातिक वा मनोनितको अंश ६०-४० बनाउने विषयमा छलफल गर्ने महर्जन बताउँछिन् ।

‘हामी अधिकारका कुरा गर्ने गर्छौं, सबैका समानुपातिक सहभागिताको कुरा गर्छौं तर, आफैंमा जब कार्यान्वयनमा पुग्छौं त्यतिबेला चुक्ने रहेछौं’ उनी भन्छिन् ।

आफूसँग जोडिएका नेता कार्यकर्तालाई कहाँ सेटिङ गर्न सक्छु भन्ने सोचका कारण पार्टी बिग्रेको भन्दै उनले भनिन् ‘तर, आन्तरिक चुनावी अभ्यास सुरू भएपछि अब पार्टी बन्छ कि हेरौं ।’

 

यो खबर पढेर तपाईलाई कस्तो महसुस भयो ?

Khusi
                                chhu

खुसी

Dukhi
                                chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

छुटाउनुभयो कि ?