+
+

७ वर्षपछि राष्ट्रिय टिममा जितेन्द्रको पुनरागमन

गोविन्दराज नेपाल गोविन्दराज नेपाल
२०७८ माघ २९ गते २०:१३

२९ माघ, काठमाडौं । नेपाली राष्ट्रिय क्रिकेट टिममा जितेन्द्रकुमार मुखियाले सात वर्षपछि पुनरागमन गर्दै शनिबार युएईविरुद्ध खेले ।

ओमानमा भइरहेको चारदेशीय टी-२० सिरिजको दोस्रो खेलमा नेपालले युएईविरुद्ध खेल्दा २९ वर्षीय जितेन्द्रले तीन ओभर बलिङ गरे । २५ रन खर्चिएर विकेटविहीन रहे । तर खेल भने नेपालले २५ रनले गुमायो । लामो समयपछि राष्ट्रिय टोलीमा पुनरागमन गर्दा जितेन्द्र निकै खुशी छन् । जितेन्द्रको प्रदर्शन पनि ठीकठाक रह्यो ।

जितेन्द्रको चाहना राष्ट्रिय टिममा रहिरहने छ । ‘कोसिस त यो हुन्छ कि राष्ट्रिय टिमका कन्टिन्यू गरिरहुँ । जितेन्द्रले ओमानबाट ह्वाट्सएप कुराकानीमा भने, ‘नेसनल टिममा राम्रो गरेर म्याचहरु जिताइराखौं भन्ने चाहना छ ।’

सन् २०१४ मा बंगलादेशमा भएको टी-२० विश्वकपमा नेपालले उत्कृष्ट प्रदर्शन गर्दै दुई खेल जित्दा जितेन्द्रको निकै चर्चा भएको थियो । त्यसपछि उनले सन् २०१५ मा एक खेल खेल्न पाए । त्यसपछि भने चोटका कारण उनी राष्ट्रिय टिमबाट टाढिए ।

जितेन्द्रले हिम्मत हारेनन्, उपचार गराए, निको भएपछि फेरि क्रिकेटमा फर्किए र अहिले राष्ट्रिय टिममा पुनरागमन गरे ।

खेल नै सबैथोक

खेलाडीको लागि खेल्नु भन्दा ठूलो केही हुँदैन । अनि चोट भन्दा पीडादायी अर्को केही हुँदैन । जितेन्द्रले राष्ट्रका लागि खेलेर खुशी बटुले अनि चोटको पीडासमेत भोगे । त्यसैले उनीसंग दुवै खाले अनुभव छ ।

राम्रो फर्ममा रहेको खेलाडी चोट लागेर खेल्न नपाउँदा उनलाई पनि धेरै पीडा भयो । त्यो समय उपचारको राम्रो व्वयस्था पनि थिएन । ‘सुरुमा चोट लाग्दा लास्टै गाह्रो भएको थियो । त्यतिबेला के गर्ने, कसो गर्ने राम्ररी थाहा पनि थिएन । हामीसंग फिजियो पनि थिएन । उपचार गर्न कहाँ जाने भन्ने निर्णय गर्न पनि गाह्रो भएको थियो’ जितेन्द्र सम्झन्छन् ।

जितेन्द्रले उपचार गराए । ठीक भएपछि विभागीय टोली आर्मीबाट क्रिकेट खेल्न थाले । आर्मी नै त्यस्तो ठाउँ बन्यो जसले उनलाई क्रिकेट छाड्न दिएन । ‘चोट ठीक भएपछि आर्मीमा आवद्ध थिएँ । त्यही भएर गेमबाट टाढा भइन’ उनी भन्छन् ।

उनी क्रिकेटमा फर्किएपछि पछिल्लो दुई वर्ष घरेलु प्रतियोगिताहरुमा भने राम्रो प्रदर्शन गरे । आफ्नो प्रदर्शनका कारण उनलाई राष्ट्रिय टिममा फर्किने विश्वास थियो । ‘यति विश्वास थियो कि राम्रो प्रदर्शन गरेँ भने राष्ट्रिय टिममा फर्कने आशा थियो’ उनी भन्छन् ।

अब भने उनी राष्ट्रिय टिमबाट टाढा हुन चाहँदैनन् । ‘सात वर्षपछि सपना साकार भयो । अब राष्ट्रिय टिममा लामो समय खेलौँ भन्ने इच्छा छ’ जितेन्द्रले भने ।

टिममा चुनौती छ

सन् २०१४ मा नेपालले विश्वकप खेल्दा र अहिलेको टिममा धेरै फरक छ । टिममा नयाँ कप्तान युवा खेलाडीहरुको बाहुल्य छ । त्यो बेलाका कप्तान पारस खड्काले सन्यास लिइसके । अर्का खेलाडी शक्ति गौचनले पनि सन्यास लिइसके । सन् २०१४ मा नेपाललाई विश्वकप पुर्‍याउने पुबुदु दसानायके भने अहिले पनि प्रशिक्षकको भूमिकामा छन् ।

सन् २०१३ मा पुबुदुले नै जितेन्द्रलाई राष्ट्रिय टिममा ल्याएका थिए । २०१४ को विश्वकप खेल्ने टिममा रहेका जितेन्द्रसहित पूर्व कप्तान ज्ञानेन्द्र मल्ल, शरद भेषावकर र प्रदिप ऐरी मात्र अहिले टिममा छन् ।

राष्ट्रिय टिममा आएका नयाँ खेलाडीका जितेन्द्रले केही चुनौती महसुस गरेका छन् । ‘मेरो लागि मैले आफूले पुस गर्नुपर्छ । हरेक कुरामा योजना गर्नुपर्छ । चुनौतीहरु छ । त्यसमा आफूले कस्तो गर्न सकिन्छ भन्नेमा भर पर्छ’ उनी भन्छन् ।

विश्वकपमा पुग्ने विश्वास

दोस्रो पटक टी-२० विश्वकप खेल्ने लक्ष्यसहित नेपाली क्रिकेट टोली अहिले ओमानमा छ । ग्लोबल क्वालिफायरमा समूह ए मा नेपालसहित ८ टिम छन् । जसमध्ये दुई टिममात्र अष्ट्रेलियामा अक्टोबर नोभेम्बरमा हुने टी-२० विश्वकपमा छनोट हुनेछन् ।

त्यसैले छनोटमा उत्कृष्ट प्रदर्शन गर्नुपर्ने चुनौती छ । समूह चरण पार गर्दै सेमिफाइनल पनि जितेर फाइनल पुगेपछि मात्र विश्वकप पुगिन्छ । यस पटक थोरै टिम र फरक स्थिति रहेकाले क्वालिफायरका खेल प्रतिस्पर्धात्मक छ । जितेन्द्र पनि त्यही मान्छन् । तर टिम राम्रो रहेको उनको बुझाई छ ।

‘हामीसंग सन्तुलित टिम छ । ब्याट्सम्यानहरु फर्ममा छन् र बलरहरु पनि राम्रा छन् । आशा छ हामी यो क्वालिफायरमा राम्रो गर्दै विश्वकपमा छनोट हुनेछौँ’  जितेन्द्रले विश्वास राखेका छन्, ‘राम्रो गर्नका लागि खेल्छौँ तर क्रिकेट हो जे पनि हुन सक्छ ।’

लेखकको बारेमा
गोविन्दराज नेपाल

नेपाल अनलाइनखबर डटकमका खेलकुद संवाददाता हुन् ।

यो खबर पढेर तपाईलाई कस्तो महसुस भयो ?

Khusi
                                chhu

खुसी

Dukhi
                                chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

धेरै कमेन्ट गरिएका

छुटाउनुभयो कि ?