बलात्कारको आरोपमा भरतपुर महानगरका सब-इन्जिनियर पक्राउ

८, फागुन, चितवन । बालिका बलात्कारको आरोपमा प्रहरीले भरतपुर महानगरपालिकाका सब-इन्जिनियर जीवन पौडेललाई पक्राउ गरेको छ ।

६ वर्षकी बालिका बलात्कार गरेको आरोपमा प्रहरीले भरतपुर- २ आँपटारीका ३६ वर्षका पौडेललाई पक्राउ गरेको हो । उनीमाथि अनुसन्धानका लागि हिरासतमा राख्न जिल्ला अदालत चितवनबाट अनुमति लिएको जिल्ला प्रहरी कार्यालय चितवनका डीएसपी नरहरि अधिकारीले जानकारी दिए ।

पौडेल भरतपुर महानगरको वडा नम्बर २९ कार्यालयका सब-इन्जिनियर हुन् । बालिकाकी आमाले पौडेलले पटक-पटक बलात्कार गरेको र घटनाका बारेमा नभन्न दबाब दिएको भन्दै प्रहरीमा उजुरी गरेकी थिइन् । बालिकाको भरतपुर अस्पतालमा स्वास्थ्य परीक्षण गरी पुर्नस्थापना केन्द्रमा राखिएको छ ।