१५ फागुन, काठमाडौं । गौतमबुद्ध अन्तर्राष्ट्रिय विमानस्थलमा क्यालिब्रेसन फ्लाइट सम्पन्न भएको छ । नेपाल नागरिक उड्डयन प्राधिकरणका अनुसार निर्धारित समय अनुसार आइतबार फ्लाइट सम्पन्न भएको हो ।
एरोथाइको जहाज ५ फागुनमा नेपाल आएको हो । यो जहाजले आइतबारसम्म नै तोकिएको उडानहरु पूरा गरेको प्राधिकरणले जनाएको छ । पूर्वनिर्धारित तालिका अनुसार जहाज सोमबार थाइल्याण्ड फर्कनु पर्ने थियो । तर, उपकरण जडित जहाज नेपाल आएको मौकामा करिब आधा दर्जन आन्तरिक विमानस्थलहरुमा पनि परीक्षण उडान गर्ने योजना बनाइएको छ । सोही अनुसार जहाज आइतबार नै पोखरा जाने भएको छ । त्यसपछि आन्तरिक विमानस्थलहरुमा परीक्षण उडान गरिने छ ।
नेपाल नागरिक उड्डयन प्राधिकरणका महानिर्देशक प्रदीप अधिकारीका अनुसार जहाज मार्च ४ तारिखसम्म नेपालमै रहने छ । यो जहाजबाट पोखरा, विराटनगर, नेपालगञ्ज, सिमरा र काठमाडौंमा क्यालिब्रेसन उडानको तयारी छ । ‘हामी सकेसम्म रात्रिकालीन उडान हुने सबै विमानस्थलको परीक्षण गर्न खोज्दैछौं,’ उनले भने, ‘क्यालिब्रेसन भइसकेका र सो अनुसार जडित उपकरणले अहिले ठिक किसिमले काम गरे–नगरेको हेर्न परीक्षण उडान गर्न लागिएको हो ।
काठमाडौंस्थित त्रिभुवन विमानस्थलमा पछिल्लो समय ३ सय मिटर धावनमार्ग विस्तार गरेपछि क्यालिब्रेसन फ्लाइट गरिएको छैन । प्राविधिक रुपमा विमानस्थल सुरक्षित छ भन्ने सुनिश्चित हुन नयाँ संरचना बनेपछि यस्तो परीक्षण गर्नुपर्ने हुन्छ । सोहीकारण आन्तरिक तथा काठमाडौंमा भने क्यालिब्रेसन परीक्षण हुने भएको हो ।
प्राधिकरणका अनुसार ‘आइएफआर सिस्टम’ जडान भएका सबै विमानस्थलमा हरेक दुई/दुई वर्षमा यस्तो परीक्षण गर्नुपर्छ । यसले जडित प्रणालीहरु ठिक छन् वा छैनन् भन्ने परीक्षण हुन्छ । तर, पछिल्लो समय धेरै समयदेखि यस्तो परीक्षण गरिएको थिएन । नेपालमा जहाज आएको मौकामा ती आन्तरिक विमानस्थलहरुमा समेत परीक्षण गर्न लागिएको हो । सोहीकारण जहाज अझै एक साता नेपालमा रहने भएको हो ।
गौतमबुद्ध विमानस्थलमा अबको प्रक्रिया के ?
आइतबार सकिएको क्यालिब्रेसन फ्लाइटपछि अब एरो थाईले प्रतिवेदन नेपाल नागरिक उड्डयन प्राधिकरणमा बुझाउने छ । यसरी प्रतिवेदन आएपछि यसलाई प्राधिकरणको एरोनटिकल इन्फरमेसन म्यानेजमेन्ट (एएमआई) विभागले प्रकाशित गर्छ । जसका आधारमा विमानस्थल उडानयोग्य भए/नभएको निश्चित हुन्छ । त्यसपछि विमानस्थलमा परीक्षण उडानको बाटो खुल्ने ति अधिकारीले जानकारी गराए । परीक्षण उडान सम्पन्न भएपछि भने प्राधिकरणले व्यवसायिक उडानका लागि एयरलाइन्स कम्पनीलाई आह्वान गर्नेछ । यो विमानस्थलमा बुद्ध जयन्तीको अवसर पारी २ जेठमा उद्घाटन उडान गर्ने तयारी प्राधिकरणले गरेको छ ।
अबको दुई महिनामा विमानस्थलमा अध्यागमन, सुरक्षा निकाय, भन्सार, नेपाल आयल निगमसहितका सरोकारवाला निकायले समेत आफ्ना संरचनाहरु यहाँ राख्नेछन् । त्यसपछि विमानस्थल व्यवसायिक उडानका लागि योग्य हुनेछ । सन् २०१४ मा निर्माण थालिएको यो विमानस्थल ८ वर्षपछि संचालनमा आउने प्रक्रियामा छ । यो विमानस्थल आयोजना राष्ट्रिय गौरवका आयोजनामध्ये सबैभन्दा कम समयमा संचालनमा आउने आयोजना बन्दैछ ।
लेखकको बारेमा
अच्युत पुरी
आर्थिक पत्रकारितामा सक्रिय पुरी पर्यटन तथा नागरिक उड्डयन विषयमा कलम चलाउँछन् ।
यो खबर पढेर तपाईलाई कस्तो महसुस भयो ?
खुसी
दुःखी
अचम्मित
उत्साहित
आक्रोशित
प्रतिक्रिया
Hot Properties
.jpeg)
.jpeg)
%20-%20Copy.jpg)
प्रतिक्रिया 4