१३ चैत, काठमाडौं । थाइल्यान्डको शीर्ष डिभिजनको क्लब चोनबुरी एफसीसँग भएको मैत्रीपूर्ण खेलमा नेपाल पराजित भएको छ । थाइल्याण्डको चोनबुरीमा भएके प्रतिस्पर्धामा नेपाल घरेलु क्लवसित ३–१ ले पराजित भएको छ ।
२४ मिनेटमा कन्थित मित प्रफानले पहिलो गोल गरेपछि चोनबुरीले पहिलो हाफमा १– ० को अग्रता लिएको थियो । ६५ औं मिनेटमा रेनाटो क्लिचले अग्रता दोब्बर पारे । नेपालका लागि खेलको ८३ औं मिनेटमा दर्शन गुरुङले गोल गरी नेपाललाई खेलमा फर्काउने प्रयास गरेका थिए ।
तर, इन्जुरी समयमा चोनबुरीले अर्को गोल थप्दा नेपाल ३–१ ले पराजित भयो ।
एएफसी एसियन कप छनोटको तयारीमा रहेको नेपाल यसअघि गत बिहीबार थाइल्यान्डको राष्ट्रिय टिमसँगको अन्तर्राष्ट्रिय मैत्रीपूर्ण खेलमा २–० ले पराजित भएको हो ।
चोनबुरी एफसीसँगको खेलमा राष्ट्रिय टोलीका अधिकांश नियमित खेलाडीलाई आराम दिइएको थियो । नेपालको कप्तानी अनन्त तामाङले गरेका थिए । गोलरक्षकमा दीप कार्कीलाई मौका दिइएको थियो ।
जुनमा हुने एसियन कप छनोटको खेलमा नेपाल जोर्डन, कुबेत र इन्डोनेसिया रहेको समूह एमा छ ।
प्रतिक्रिया 4